India-a firfiak hmasa ber chu Hindu a ni : Kamal Haasan

Makkal Needhi Maiyam (MNM) founder Kamal Haasan chuan India rama firfiak hmasa ber chu Hindu a ni a, a hming pawh Nathuram Godse a ni tiin, Mahatma Gandhi thattu chungchang a sawi. 

Tamil Nadu-a election campaign a neihnaah actor-politician chuan he thu hi a sawichhuak a, hemi rual hian amah chu Indian a nih chhuangtu zinga mi, India rama mitinte intluk tlanna duhtu a nih thu a sawi. India hnam puanzara rawng chi thum inpawlh chuan sakhaw hrang hrangte inzawmna a tilang a ni, a ti bawk. 

Aravakurichi-a a campaign-naah Haasan chuan an awmna hmun chu Muslim tamna bial a nih avanga he thu hi sawi a ni lo tih a sawi a, he thil hi Gandhi lim hma ngeiah a sawi chhuak tih a sawi bawk. "India ram a zalen hnuah firfiak hriat hmasak ber chu Hindu a ni a, a hming chu Nathuram Godse a ni. Ani a lo lan hian firfiaka chetna hi a inṭan a ni", a ti. Haasan chuan kum 1948-a Mahatma Gandhi thah a nih chhan tak chu hriat a duh tih a sawi bawk. 

"India mi ṭhate chuan intluk tlanna an duh a, hnam puanzara rawng chi thum awmte pawh awm chhunzawm zel turin an duh a ni. Kei pawhin chhuang takin India mi ṭha tak ka ni tih hi ka puang duh a ni", tiin a sawi. BJP chuan Kamal Haasan thusawi hi an chhang let nghal a, "Kamal Haasan-a'n poll campaign-naa Hindu firfiak chungchang a sawi hi kan dem hle a ni. A thusawi hian sakhaw inkarah buaina a chawk chhuak thei a ni. Hei vang hian Election Commission pawhin a chungah action a la ngei tur a ni", an ti.