State agency-te Eklavya school sak tir turin sorkar laipui ngen

Meghalaya sorkar chuan union ministry of tribal affairs hnenah state agency-te chu Eklavya Model Residential School (EMRS) sak phalsak turin a ngen tih education minister Lakhmen Rymbui chuan Assembly-ah a sawi. 

EMRS hi kum 1997-98 khan ram chhung hmun kilkhawr zawka scheduled tribe zirlaite'n zirna ṭha an dawn ve theihna atana kalpui ṭan a ni a, kum 2012 khan block tina cheng zingah tribal mi 50% awmna emaw, tribal 20,000 chin emaw an awmna apiangah EMRS din hi rel a ni. 

Ministry chuan Meg­ha­laya state chhungah hian a thuphungin EMRS 40 dinna tur chu a sanction tawh a, mahse heng school sak hna hi state pawn lama agency-te hnenah pek a ni tih Congress MLA HM Shangpliang zawhna a chhannaah Minister Rymbui chuan a sawi. Minister chuan he project atana expression of interest (EOI) zawn a nih lai khan, Covid-19 hripui leng avangin state agency-te chu an tel ve thei lo a ni, a ti. 

Chief minister Conrad Sangma chuan ministry of tribal affairs hnenah hian lehkha thawnin, school sak hna chu state agency leh corporation-te hnena pek a nih theihna tura ngaihtuah ṭha leh turin a ngen a, hei hi a chhanna an la dawng lo niin Rymbui chuan a sawi bawk.