Tripura West Constituency inthlan ṭhatah vote 72.32% a tla Congress leh CPI-M-ten inthlan tihchingpen a nih thu an sawi

Tripura West Parliamentary constituency-a polling station 168-ah Pathianni khan vote thlak ṭhat a ni a, report hnuhnung berah chuan vote 72.32% a tla nia tarlan a ni. 

Congress chuan Debram Thakur Para booth polling agent chu BJP activist-ten an sawisa tih an sawi. Henglai area-ah hian BJP activist  eng emaw zat hmuh tur an awm tih an sawi bawk. Hetih lai hian Debram Thakur Para booth awmna Khayerpur Constituency BJP MLA chuan Congress in an puhna chu thu dik lo a nih thu a sawi thung. 

Pathianni vek khan CPI (M) chuan press conference koin Election Commission leh Central Armed Forces-ten theihtawp chhuahin insawi mah se inthlan ṭhat neihna polling station hrang hrangah inthlan tihchingpen a ni tih an sawi. Heti chung hian inthlanna neih hmasak ang em emin inthlan tihchingpen nasat a nih loh thu an sawi thung a, an lawm ve thawkhat hle tih an sawi.

CPI (M) state secretary Gautam Das chuan West Tripura Lok Sabha seat-a inthlan ṭhat neih chu ralmuang tak leh dik taka kalpui a ni lo tih a sawi. BJP chu a hma ang thoin an inlan leh tih sawiin, polling station tam takah chuan an polling agent-ten awm duh mah se phalsak an ni lo tih a sawi a ni.

BJP misualte chuan polling station hrang hrangah buaina an chawkchhuak tih sawiin, vote thlaktu ṭhenkhat chu an lo vau tih a sawi bawk. Armed force-te chuan hmun tam takah venhimna ṭha takin kalpui mah se voter 10-15%-te chuan vote an thlak thei lo tih a sawi. Hei hi voter percentage aṭangin a langchiang hle tih a sawi bawk.

CPI(M) chuan eptu party polling agent-te chu venhimna pek an phut bawk a, an chhungkua leh anmahni chu venhimna pek an ngai tih an sawi a ni.