Manipur-ah hel pasarih man, ralthuam ṭhahnem tak man bawk

Manipur police leh Assam Rifles ṭangkawpte chuan kar liam ta Ningani khal hel pawl pathum aṭangin hel pasarih an man tih an sawi.

An hel mante kut aṭang hian ralthuam leh silai mu tam tham tak an man tel bawk. UNI report chuan Assam Rifles leh Manipur police-te chuan Manipur-a Kamjong district, Myan­mar nena an inrinaah helte hi kar liam ta Ningani khan an man tih Pathianni khan an tarlang. 

Intelligence-te hnen aṭanga an thudawn bawh­zuiin Assam Rifles leh Ma­nipur police ṭangkawpte hian Indo-Myanmar border-a Kamjong district-ah beihpui an thlak a ni. PREPAK hel panga, KYKL hel pakhat leh UNLF hel pakhat an man tih tarlangin, ralthuam leh silaimu tam tham tak an man tih an tarlang bawk.

Hel leh ralthuam an mante hi Imphal West district-a Imphal police station hnenah an hlan a ni.