Congress leh NGO-ten NEIGRIHMS buaina an dem

North Eastern Indira Gandhi Regional Institute of Health and Medical Sciences (NEIGRIHMS) buaina vangin kar liam ta Zirtawpni khan Mawphlang mi nu pakhat kum 55 mi chu zai hun tura zai theih a nih loh vangin a thi.

NEIGRIHMS Director Dr. DM Thappa leh Cardio­logy department, HoD Dr Animesh Mishra-te inkara inhmuhthiam lohna a awm avangin hmarchhak damdawi-in lian hian buaina nasa tak an hmachhawn a, kar liam ta Ningani khan High Court pawhin an buaina chinfel dan ngaihtuah turin hotu pahnih hi thu a pe hial tawh bawk.

Chief Minister hlui leh Congress hruaitu Dr. Mukul Sangma chuan NEIGRIHMS buaina chu mumal taka chhui chian a ṭul hle tih a sawi. Assembly House-a opposi­tion leader ni bawk Mukul Sangma chuan buaina chu dan ang taka chinfel a hun tawh tih a sawi. State sorkar pawh bei zuiin Sangma chuan buaina chingfel thei loah a puh. Sorkar chuan damdawi-in buaina chu an la thutak lo hle a ni, a ti. 

Sangma chuan mipuite chuan sorkarah beiseina an neih tawh loh avangin court inrawlh turin an beisei tih a sawi. Nunna chan an awm phah hial chu pawi a tih thu leh,  sorkar pawh a dem thu a sawi. Damdawi-in chu intihbuaina hmun tur a ni lo tih a sawi bawk.
Federation of Khasi, Jaintia and Garo People (FKJGP)-te pawhin NEIGRIHMS director leh Cardio HoD inkara buaina chhuak chu an dem tih sawiin, Pathianni khan thuchhuah an siam.

FKJGP Central Body President, Wellbirth Rani chuan hotu pahnihte inkara buaina chhuak vang chuan nunna hial chan phah an awm ta a ni, a ti. Rani chuan damdawi-in director leh Cardio HoD inkara buaina chhuak chu a naupan chhiat thlak hle tih a sawi a, an buaina avanga mamawh neih theih loh avangin nunna hlu tak chan a nih phah tih a sawi. Damlo chuan ni nga chhung ṭul lo takin ṭanpuina a nghak a, mahse ṭanpuina chu a dawng lo tih a sawi a ni.