Assam: Hailakandi-ah Curfew pawtsei

Hailakandi district-a buaina chhuak vanga zan curfew puan, Thawhṭanni thleng atana puan chu pawtseiin, ni 10 chhung  puan chhunzawm a ni dawn tih Assam Tribune chuan a tarlang.

Hailakandi Deputy Commissioner Keerthi Jalli-i chuan Thawhṭanni khan Zirtawpni aṭangin internet tihtawp a ni tih sawiin, nimin aṭang kha chuan internet pawh hi hman leh theih tawh a ni thung. Hetih lai hian Thawhṭanni khan chawhma dar 9 aṭangin darkar ruk chhung curfew hi thlahdul a ni a, buaina chhuak erawh a awm lo.

Jalli chuan thuneituten social media moni­toring cell an siam tih sawiin, anni hian social media-a thu post-te an endik reng dawn tih a sawi. Buaina chhuah nia social media-a buaina tipunlun zawnga thu post-tute pawh an zawnchhuah dawn thu leh dan ang taka hrem an nih dawn thu a sawi a ni.

Deputy Commissioner chuan internet service tihtawp chuan bank hnathawh leh ATM hmanna kawngah buaina a thlen tih an pawm thu sawiin, nimin aṭang kha chuan ATM chu hman theih leh tawh a ni dawn tih a sawi. Thawhlehni thleng kha chuan zirna in leh sorkar office-te pawh khar an la ni bawk.

Zirtawpni liamta khan Hailakandi-ah hian pawl pahnih inkarah buaina nasa tak a chhuak a, mi pakhua in hliam an tuar a, mi pakhatin a thih phah bawk. Muslim-te Ramzan puala kawngpuia ṭawngṭaina neih an tum duh lotuten duh lohna an lantirnaah buaina hi a chhuak a ni.

Hliam tuar mi pakuate hi Silchar Medical College Hospital-ah enkawl mek an la ni bawk. State sorkar chuan nunna chan chhungte hnenah hian zángnadawmna cheng nuai nga an pek dawn thu a sawi tawh a, hliam tuarte pawh hi cheng 50,000 ṭheuh a pe dawn bawk a ni.

Thawhlehni khan tui erawh sem ṭan a ni leh tawh a, police-te venna hnuaiah tui hi sem a ni. Senior citizen-te chuan Deputy Commissioner hmuin meeting an neihpui a, buaina chhuah vanga thil man sang chungchangte an sawipui a ni. SC Jalli-i chuan district thuneituten hemi chung­changah hian hma an lak dawn thu a sawi.