Hmarchhak-Bangladesh insumdawn tawnna leh Inkalpawhna enfiahna meeting nei

Indian High Commi­ssioner to Bangladesh Riva Ganguly Das chuan Thawhṭanni khan  Tripura Chief Minister Biplab Kumar Deb meeting neih­puiin, India in hmar­chhaka Bangladesh nen insumdawn tawnna an kalpui dan leh inkalpawh­na chungchang a sawipui.

Indian High Commi­ssioner to Bangladesh chuan Chief Minister nen meeting an neih zawh hnu hian insumdawn tawnna leh inkalpawhna chungchang mai piah lamah project dang chung changte pawh an sawidun tih a sawi. Bangladesh nena insumdawn tawnna kawngah hian Tripura chu a pawimawh hle tih sawiin, insumdawn tawnna nasa zawk neih nan leh inkalpawhna ṭha zawk neih nan Tripura chu kalka pawimawh tak a nih thu a sawi.

Riva Ganguly Das chuan border market (border haats) tam zawk hawn a nih dawn thu a sawi bawk. Border market-ah hian India leh Bangladesh mi, dawr neite chuan chhiah chawi loin thil an zuar thei a ni. India leh Bangaladesh hian an insumdawn tawnna tihchangtlun nan hian Tripura leh Meghalaya-ah kum 2011 aṭang khan border haats an siam a ni. 

Das chuan ram pahnih mipuite inkarah pawh inbiakpawhna ṭha zawk awm tir an tum tih a sawi a, inkalpawhna kawnga project an siam erawh chuan hun a duh rei deuh dawn tih a sawi thung.