Meghalaya Health Minister-in Ri-Bhoi district a tlawh
Meghalaya Health and Family Welfare Minister Alexander Laloo Hek chuan Thawhlehni khan sorkar official ṭhenkhatte nen Ri-Bhoi district-a Balkhawa thingtlang khua an tlawh.
Balkhawa khua hi tunhnaia Assam police-ten an man Hima Nongspung Secretary, Michael Warjri-te khua kha a ni. AL Hek hi Urban Affairs Minister, Hamletson Dohling, Meghalaya Industrial Develop-ment Corporation, Renikton Tongkhar, Jirang tualchhung MLA Sostheness Sohtun leh Nongstoin MLA Macmillan Byrsat-ten an ṭawiawm a ni.
Sorkar aiawha kalte hian Michael Warjri-a chenna hi an tlawh bawk. Michael Warjri hian Assam sorkar PMGSY kawngpui siam project a dodal a, hemi vang hian police-te chuan an man a ni. Hek chuan Ri-Bhoi district thuneitute hnen aṭangin thil thlen dan report kimchang an hriat duh thu sawiin, Meghalaya state china Assam sorkar a inrawlh chu a dem tih a sawi.
"Inter-State border-a chengten hamṭhatna an dawnna turin sorkar chuan developmental programme a siam vat dawn a ni", a ti. Jirang local MLA Sostheness Sohtun pawhin sorkar chuan Balkhawa-ah hian police outpost siam se a duh thu a sawi. Urban Affairs Minister, Hamlet Dohling pawhin Balkhawa khuaa thil thleng chungchangah Assam Chief Minister Sarbanada Sonowal a biak a ṭul dawn thu a sawi ve bawk. Meghalaya leh Assam sorkar aiawh senior official-te chuan ramri chungchangah hian inbiakna neih a ni dawn tih sawiin, hei hi ramri lehlam lehlama chengte himna atan pawh a pawimawh tih a sawi.
Hamlet Dohling chuan meeting an neih turah hian state pahnihten hun rei tak an buaipui tawh ramri chungchanga inhriatthiam lohna awm chu an sawiho dawn tih a sawi bawk. Michael Warjri hi May 7 khan Assam police-ten an man a, vawiin thleng hian chhuah a la ni lo. Man a nih hnu lawkah hian misual tu tih hriat lohten a chenna in hi an suasam a ni.