Tripura-in ICP leh border haats pahnih neih belh dawn

Sorkar laipui chuan Tripura sorkarin rawtna a siam, Integrated Check Post (ICP) pahnihna tur siam leh border haats (border market) pahnih siam belh an rawtna chu a pawmpui tih Thawhlehni khan official-te chuan an sawi. 

Hei hi ram ṭhenawm Bangladesh nena in­sum­dawn tawnna kawnga hmasawnna leh inlai­chinna ṭha zawk a awm theihna tur atana hmalak­na a nih thu tarlan a ni bawk. Thawhṭanni khan Delhi-ah Ministry of Home Affairs (MHA)-a border management secretary kaihhruaina hnuaiah inter-ministerial meeting neih a ni a, hetah hian Tripura sorkar rawtna hi pawmsak an nih thu Special Secretary, Industries and Commerce of Tripura, Kiran Gitye chuan a sawi a ni. 

Land Port Authority of India (LPI) chuan South Tripura-a Sabroom sub-division-ah ICP hi an siam dawn a, hei hi Indo-Bangla border-a ICP pahnihna tur a ni. ICP hmasa ber chu Akhaura-ah 2013 khan siam a ni tawh thung. Gitye chuan  North Tripura district-a Raghna-ah leh South Tripura district-a Ghosh Khamar-ah te border haat siam belh a ni dawn tih a sawi bawk a, heng khaw pahnih-te hi Bangladesh leh Tripura inrinate an ni.

ICP project hi Prime Ministers Office (PMO)-in a enpui dawn a, official-te chuan geo-political lamah pawimawhna thuk tak a neih vangin PMO hi an inrawlh tih an sawi.  Tripura sorkar hian kum 2016-ah daih tawh khan ICP siam belhna tur hian rawtna an thlen tawh a ni.