Guwahati-ah bomb a puak Mi 8-in hliam an tuar
Assam state khawpui Guwahati-a RG Baruah Road-a Guwahati Central mall kawtah Nilaini zan dar 7.55 velah khan grenade a puak a, mi pariat in hliam an tuar.
Hliam tuar zingah hian Sashasta Seema Bal (SSB) mi pahnih an tel a, midang paruk hi chu civil mi an ni thung. Civil mi hliam tuar zinga pakhat chu a dinhmun a ṭha lo hle tih an tarlang.
Hliam tuarte hi Guwahati Medical College-ah hruai nghal an ni a, dinhmun ngaihtuahawm nia an sawi hi mall kawta pop corn zuartu a ni tih an tarlang bawk. Assam Tribune in a tarlan dan chuan Assam police-te leh SSB-te hi Nilaini tlai dar 5 velah khan bomb puahna hmun velah hian duty tura tirh an ni a, hel ten motorcycle aṭangin bomb hi an vawm nia rin a nih thu a tarlang bawk a ni.
Bomb puak hian thil tihchhiat lian tham a neih tarlan a ni rih lo a, kawngpuiah thisen a luang nasa hle tih erawh tarlan a ni thung. Chhiatna thlenna hmun hi police-te chuan civil mite kal theih lohna turin an dang nghal bawk. Police-te chuan hel ten an awm ngei a ni tih hriattirna turin Guwahati khawpuiah hian eng emaw an ti dawn tih an rinhlelh lawk thu an sawi a, mahse khawilai tak nge beih an tum erawh an hre thei lo tih an sawi.
United Liberation Front of Asom (Independent) chuan pawikhawihna hi an thlen a nih thu an sawi a, ULFA(I) commander-in-chief Paresh Baruah chuan chanchinbu mite phone hmanga bia in Central force-te an beihna a nih thu a hrilh tawh nia tarlan a ni.
Chief Minister Sarbananda Sonowal chuan bomb tipuaktute chu a dem thu sawiin, Director General of Police hnenah pawikhawihtute manchhuak vat turin a hriattir nghal.
Chief Minister Sarbananda Sonowal chuan bomb tipuaktute chu a dem thu sawiin, Director General of Police hnenah pawikhawihtute manchhuak vat turin a hriattir nghal.