Meghalaya: Hima Nongspung secy Warjri bail-in chhuah

Meghalaya Ri-Bhoi district-a Balakhawa khaw mi Hima Nongspung secretary, Michael Warjri chu Nilaini khan bail-in an chhuahtir.

Michael Warjri hian Megha­laya state china Assam in kawngpui siam project PMGSY chu a dodal avangin Assam police-te hian an man a ni. Federation of Khasi, Jaintia and Garo People (FKJGP)-te chuan Thawhṭanni khan bail hi an dilsak tawh a, Nilaini khan bail an dilna hi pawmsak an ni ta a ni.

FKJGP leader, Kitboklang Nongphlang chuan bail dilna hi Thawhṭanni khan an thehlut tawh tih sawiin, an pawl hruaitu ṭhenkhat leh a chhungten jail aṭanga an hruaichhuah thu a sawi. Warjri hi FKJGP hruaitu - vice president, Eldie Newton Lyngdoh, education secretary Reginal Thabah leh general secretary, Luistar Lyngdo-ten an ṭawiawm a ni. 

Kar liam ta Ningani khan Assam police-te chuan PMGSY project a dodal avang hian an man a, man a nih hnu lawk hian Balakhawa-a a chenna in chu misual tu tih hriat lohten an suasam sak zui bawk a ni. Assam Health and Family Welfare Minister AL Hek pawhin Thawhṭanni khan Balakhawa khua hi a tlawh a, thil awmdan a enfiah a ni. Assam sorkar chu Meghalaya ram china inrawlha puhin, a dem thu a lo sawi tawh bawk.