Ram Temple sak nan hmarchhak aṭangin Rs vbc 8 dawn hmu

Shri Ram Janmbhoomi Teerth Kshetra trust chuan Ayodhya, Uttar Pradesh-a Ram temple sakna turin hmarchhak state panga aṭangin thawhhlawm, cheng vaibelchhe 7.84 an  hmu tawh tih a sawi. 

Official twitter-a an tarlan danin, Ram temple sakna tur thawhlawm hi Arunachal Pradesh aṭangi Rs vbc 4.5, Manipur aṭangin Rs vbc 2, Mizoram aṭangin Rs nuai 21, Nagaland Rs nuai 28 leh Meghalaya aṭangin Rs nuai 85 an hmu a ni. Assam, Tripura leh Sikkim aṭanga thawhlawm lutte an la tarlang tel lo thung.

Ram temple sakna atan ram chhung hmun hrang hrang aṭanga thawhlawm lut hi Rs vbc 2,500 a tling tawh a ni. Kumin January 15 aṭang khan Ram temple sakna tur hi ram pumah funding campaign neihani a, February 27 thleng khan thawhlawm hi an khawn a ni. Donation lakkhawm hna kalpui tur hian team 1,75,000 siamin, volunter nuai 9 velin an thawk.  Trust hian tun thla tawpah an sum hmuh zawng zawng hi an audit fel hman an beisei.