Assam-ah Rahul Gandhi a campaign
Congress party hruaitu Rahul Gandhi chuan nimin khan assembly inthlan neihna tur, Assam-ah an party tan campaig-in Tinsukia district-a Doomdooma hmuna election rally neihah thu a sawi.
Rally neih hmain Rahul Gandhi hian Dibrugarh-a Lahoal-ah college zirlaite kawmin, a hnuah tea Dinjoy-a tea estate worker-te a hmu dawn bawk a ni. Rahul Gandhi hi ni hnih a cham dawn a, vawiin hian Jorhat district leh Sonitpur district-a election rally-ah thu a sawi bawk ang.
Tun ṭum hi Assam inthlan neih tur atana Rahul Gandhi ṭum hnih a campaign-na a ni. February 14 khan Sivasagar district a lo tlawh a, March 1 leh 2 khan a farnu, Congress general secretary Priyanka Gandhi Vadra pawhin Assam hi tlawhin tear garden women worker leh self help group (SHG) member-te meeting a neihpui a, Tezpur-a public rally-ah thu a sawi bawk.
Assam Pradesh Congress Committee (APCC) chuan Priyanka Gandhi Vadra leh party senior leader dangte chu campaign-in an state-ah hian an kal leh dawn tih an sawi.
Vawiinah Tinsukia-ah PM-in thu a sawi dawn
Prime minister Narendra Modi pawh BJP tana campaign-in, vawiin hian Tinsukia district-a election rally-ah thu a sawi dawn.
Prime minister Narendra Modi pawh BJP tana campaign-in, vawiin hian Tinsukia district-a election rally-ah thu a sawi dawn.
BJP senior leader, Shew Dubey chuan vawiina rally neih turah hian BJP supporter mi nuai khat chuang an tel an beisei thu a sawi. Assembly inthlan hmasaa PM Modi-a'n a campaign pui avang hian upper Assam lamah BJP in an chet ṭhat phah hle tih sawiin, Dubey chuan vawiina rally a hmanpui tur pawh hian an party tan result ṭha tak a siam phah ngei a rin thu a sawi. Kum 2016-a assembly inthlanah khan BJP leh a thawhpuite chuan upper Assam-a assembly seat 12 awm zingah seat 11-ah hnehna an chang a ni.
Dubey chuan PM hian chawhnu dar 2.30 ah thu a sawi dawn tih sawiin, Tinsukia leh Dibrugarh district-a BJP leh a thawhpui party-a candidate zawng zawngte an tel dawn tih a sawi. March 14 khan union home minister Amit Shah chuan Tinsukia district-a Margherita-a rally neihah thu a lo sawi tawh bawk. January 23 khan PM chuan Sivasgar tlawhin, ram nei lo chhungkaw nuai 1.06 hnenah land document a lo sem tawh bawk a ni.
ECI-in category pathumah observer ruat
Election Commission of India (ECI) chuan Assam-a thawh thuma assembly inthlan neih tur buaipuitu tur, observer chu category pathum hnuaiah a ruat.
Election Commission of India (ECI) chuan Assam-a thawh thuma assembly inthlan neih tur buaipuitu tur, observer chu category pathum hnuaiah a ruat.
General observer, police observer leh expenditure observer-te ruat niin, heng atan hian IAS, IPS, IRS, IRS (C&CE), IRAS, IDAS te ruat an ni a, Legislative Assembly Constituencies (LACs) 126-ah dah an ni. General observer atan hian mi 90, police observer 31 leh expenditure observer 53 ruat an ni.
Inthlan thawh khatna, constituency 47-a neih turah general observer 31 (IAS), police observer 10 (IPS) leh expenditure observer 20 (IRS, IRS (C&CE), IRAS, IDAS cadres) te dah an ni. Inthlan thawh hnihna atan general observer 26, police observer 12 leh expenditure observer 16 bakah, inthlan thawh thumna atan general observer 33, police observer 9 leh expenditure obsever 17 ruat an ni bawk. Inthlan thawh hnihna hi bial 39 ah neih niin, a thawh thumna hi bial 40-ah neih a ni ang.
ECI chuan special central observer pathum a dah bawk a, Sudarsanam Srinivasan chu special general observer atan ruatin, special police observer atan Ashok Kumar leh special expenditure observer atan Neen Nigam a ruat.