Assam-ah Congress-in manifesto tlangzarh

Assam assembly inthlan neih tur atan kar liam ta Inrinni khan Congress chuan an party manifesto an tlangzarh. 

Congress hruaitu Rahul Gandhi chuan party election manifesto hi a tlangzarh a ni. Manifesto-ah hian thil panga an tiam a, heng zingah hian chhungkaw tin nu ber hnenah thla tin Rs 2,000 pek leh, Citizenship Amendment Act (CAA)  nuaibona tur dan siamte a tel. 
Rahul Gandhi chuan BJP leh RSS ten Assam tihchhiah leh ṭhendarh tuma an beih rengna chu an party chuan a venghim tlat dawn tih a sawi. "Document-ah hian Congress symbol chuang mah se, hei hi mipuite manifesto zawk a ni. Assam mipuite duh leh beiseite chu he manifesto-ah hian dah a ni," a ti. 

Congress party chuan inthlana hnehna an chang a nih chuan sorkar  hna nuai nga siam a tiam a, thla khat atan chhungtin hnenah electricity unit 200 chin a thlawna pek bakah, tea garden worker-te minimum wage chu Rs 365-a tihsan a tiam bawk. Rahul Gandhi chuan BJP sorkar chu na taka beiin, 'BJP sorkar hnuaia demonetisation, GTS leh policy dang dang kalpui chuan ram pumah unemployment rate nasa takin a tipung a ni," tiin, Assam economy pawh BJP sorkar chuan a tichhe tawh a ni, a ti. 

Assembly inthlan neih turah Congress party hian Left party pathum - CPI(M), CPI leh CPI(ML) bakah All India United Democratic Front (AIUDF), Anchalik Gana Morcha, Bodoland People's Front (BPF), Rashtriya Janata Dal (RJD) leh community based party pahnih Jimochayan (Deori) People's Party (JDPP) leh Adivasi National Party (ANP)-te thawhpuiin, ṭangrual pawl "Mahajot" (grand alliance) an din a ni. 

Seat 126 awmna, Assam assembly inthlan hi thawh thuma neih a ni dawn a, a thawh khatna hi March 27 (seat 47) ah neih a ni dawn a, April 1 (seat 39) leh April 6 (seat 4))-ahte vote thlak chhunzawm a ni ang. Vote tlate hi May 2-ah chhiarin, result puan a ni nghal ang.