Nagaland joint committee-in RIIN kalpui duh

Nagaland-a civil society hrang hrang intelkhawm, joint committee chuan an state-a Register of Indigenous Inhabitants of Nagaland (RIIN) kalpuina tur dan siam phutin rally an huaihawt. 

RIIN hi National Register of Citizens (NRC) localised version a ni a, Joint Committee on Prevention of Illegal Immigrants (JCPI) chuan dan loa an state-a lut te venna turin, RIIN hmang hian state leilung fa dik takte register an duh a ni. 

JCPI-ah hian tribal hoho, civil society leh hmeichhe pawl hrang hrangte an tel. Inrinni khan rally hi buatsaihin, an thil phut chungchangah Chief Minister hnenah memorandum an thehlut  nghal bawk. 

Joint committee member, Theja Theriah chuan Banon Committee-in RIIN kalpuina tura rawtna a siam chu cabinet-in a pawm tawh tih sawiin, a taka kalpui turin 'law' a siam a chantir a ngaih avangin state Assembly-in a ngaihtuah a ngai a ni, a ti. 

State sorkar hian IAS Bano Z Jamir kaihhruai committee dinin, RIIN chungchang zirchiang tur leh rawtna te siam turin a ti a, commission hian rawtna a thlen hi state cabinet pawhin a lo pawmsak tawh a ni. 

JCPI-in Chief Minister hnena memoradum an thehluhah, RIIN kalpui a nih chuan state leilung fa dik takte chuan (Indigenous Inhabitants certificate) IIC an nei dawn tih sawiin, he hian state leilung fate venhim leh humhalhna kawngah nasa takin a pui dawn niin an sawi.