Manipur NPF-ten BJP an thlawpna titawp dawn
Manipur-a Naga People’s Front (NPF)-te chuan Bharatiya Janata Party (BJP) an thlawpna titawp turin thutlukna an siam.Party thupuangtu Achumbemo Kikon chuan thutlukna an siam tih hi a sawi a, Nagaland Chief Minister hlui leh NPF leader T R Zeliang pawhin Facebook-ah an thutlukna siam thu hi a tarlang a ni. Hetianga thutlukna an siam chhan hi Manipur Congress hruaitu ten NPF hi thurualpuia sorkarna siampui tura an hmin vang nia sawi a ni a, thuchiang erawh hriat a ni lo. Achumbemo Kikon chuan NPF chuan meeting rei tak an neih hnuah Manipur-a BJP an thawhpuina chu tihtawp an tum ta tih a sawi.Kikon chuan Kohima-a NPF central office-ah meeting hi an nei tih a sawi a ni. NPF hian Manipur-ah hian BJP hi an thawhpui a, mahse BJP sorkar hian an ngaihsak lo hle nia an sawina hi a rei tawh hle a, BJP sorkar lakah hian an lungawi lohna a rei tawh a ni.Tun dinhmunah erawh chuan NPF hian seat 60 awmna Manipur Assembly-ah hian seat pali chiah an lak avangin sorkarna siam mek BJP leh a thurualpuiteah hian awmzia a nei thui vak dawn lo thung. 2017 Manipur Assembly inthlanah khan Congress-in seat 28 an la a, BJP chuan seat 29 an la thung a ni. NPP in seat pali an la a, LJP in seat khat lain, Independent pakhat leh AITC pakhat an awm ve bawk.Inrinni-a meeting an neih zawh hnuah hian state unit chief Awangbou Newmai chuan BJP hian NPF chu an hmusit tih a sawi a, 2017-a ṭangruala sorkarna an siam hnu khan zah takin an en ngai lo tih a sawi. BJP hruaitu ṭhenkhat chuan an thawhpui tih an pawm duh lo tih a sawi a ni.Newmai chuan BJP chu an thutiam hlen loah a puh bawk a, mahse BJP chuan NPF puhna hi an pha thung, BJP chuan an theihtawpa thawhpuia inkungkaihna ṭha siam an tum tih an sawi. BJP thupuangtu Ch Bijoy chuan Newmai-a puhna chu thu belhchian dawl lo a ni tih sawiin, sorkarna an siam dawn pawhin ministerial dinhmun an duh lo tih a sawi. Tunah erawh thil dang an phut ta zawk nia a lan thu a sawi a ni.