Meghalaya sorkar in School naupang bag rih zawng tur bithliah

Meghalaya sorkar chuan kar liam ta Zirtawpni khan school naupang bag rih zawng turah bithliah a siam.Sorkar thuchhuah chuan Pawl I-II-te school bag rih zawng chu kg. 1.5 aia rit tur a ni lo tiin an tarlang a, Pawl III-V-te chu kg.2-3 aia rit tur a ni lo a, Pawl VI-VII-te school bag chu kg. 4 chinah a bithliah bawk. Pawl VIII-IX-te chu kg. 4.5 chinah bithliah sakin, Pawl X chinah chuaan kg. 5 aia rit bag an ak tur a ni lo, a ti bawk a ni.Zirlaite chu an zirlai atana pawimawh bak lehkhabu dang tihluihnain an ken luihtir phal an ni lo tih sorkar thuchhuah chuan a tarlang bawk. Pawl I leh II-te chu homework an pe tur a ni lo tih a tarlang a, zirlaite chuan an timetable-a inziak chin chiah lehkhabu an keng tur a ni tih a tarlang.State sorkar chuan school-a hotu lute chuan timetable mumal tak an siam tur a ni a ti a, lehkhabu tam tak an ken lohna turin mumal takin nitin timetable an siam tur a ni, a ti. Education department-te chu inkaihhruaina dan mumal tak siam thuai turin a hriattir bawk a ni. Nikum khan Ministry of Human Resource Development chuan thupek tichhuakin, State leh Union Territory zawng zawngte chu zirna kalpui dan chungchangah leh school bag rih zawng bithliah chungchangah inkaihhruaina dan siam turin a lo hriattir tawh a ni.