Ruihhlo kawltu Tripura police pathum man

Tripura police chuan Ningani khan police pathum chu ruihhlo kawl leh tawlhruknaa inhnamhnawih vangin an man. 

North Tripura district police hotu, Bhanupada Chakraborty chuan an mi mante hi constable pahnih Dilip Chakma leh Narottam Chakma bakah, Tri­pura State Rifles (TSR) jawan Sanjib Chakma-te an ni tih sawiin, an kut aṭang hian Yaba tablet leh ruihhlo dang, heroin telin mansak an nih thu a sawi. 

Chakraborty chuan an mi mante hi police leh intelligence official-ten thu an zawhfiah tawh thu sawiin, an hna ṭangin suspend nghal an ni dawn tih a sawi. Heng police pathumte hi Narcotic Drugs and Psychotropic Substances (NDPS) Act hnuaiah thubuai siamsak an ni ang. An kut aṭanga ruihhlo an man zat tak erawh sawichian a ni lo. 

Tripura-ah hian ruihhlo tawlhruknaa inhnamhnawiha puhin police 75 vel chu ban leh suspend an lo ni tawh a, an zingah hian Deputy Superintendent pawh a tel. 

Revenue department chuan thla 20 chhungin Tripura-ah NDPS Act hnuaiah thubuai 722 ziah luh a ni a, mi 1,241 man an ni bawk. Hemi chhung hian ganja kg 78,853,  heroin kg 7.375 leh ruihhlo dang tam tak man a ni bawk. 

BSF leh intelligence offi­cial-te chuan heng ruihhlo te hi Myanmar ram aṭanga lakluh niin, Bangladesh, Sri Lanka bakah India ram state dangah an kalpui ṭhin a ni.