DoNER review meeting nei

Development of North Eastern Region (DoNER) minister Dr Jitendra Singh hoin DoNER review meeting chu Ningani khan New Delhi-ah neih a ni.

Meeting-ah hian Secretary (DoNER) Dr Inder Jit Singh leh ministry senior officer-te bakah, North Eastern Council (NEC) official te an tel. 

DoNER Minister chuan financial year kal mekah DoNER ministry budget 93% dawn hman a ni tawh chu lawmawm a tih thu sawiin, fund hi 100% hmang thei tura ṭan la turin official-te a ngen. 

Dr Singh chuan Jawaharlal Nehru University (JNU)-a North-East zirlaite tana hostel thar tur sak hna pawh ngawrh taka thawh mek a nih thu a sawi a, NEC-in DoNER ministry hnuaia project a kalpui hi hmarchhak bial zirlaiten an chhawr ṭangkai dawn hle a ni, a ti. Dwarka-ah North East Convention Centre hmasa ber tur pawh thawh ṭan thuai a ni ang, a ti bawk. 

Meeting-ah hian thla ruk liam ta chhunga DoNER ministry hnathawh hrang hrangte tarlan a ni. 

    Project 212, cheng vaibel­chhe 3512.45 man tur siam a ni. Heng zingah hian cheng vaibelchhe 866.13 man project 70 chu thawh zawh a ni tawh a, cheng vaibelchhe 39.95 man project paruk chuan hna an thawk tawh. 

    A thuphungin hmarchhak biala Bamboo Industrial Park hmasa ber siamna tur pawm a ni. Hei hi Assam-a Dima Hasao District-a ram hectare 75-a zauah, cheng vaibelchhe 50 senga siam a ni ang. He project hi kum 2021 March thlaah zawh hman tum a ni. 

    Ministry-in livelihood prog­ramme pahnih a siam ṭhat, NERLP leh NERCORMP chu kalpui chhin a ni a, he project hian hmarchhak state zawng zawng a huam ang. 

    DoNER ministry leh NEC scheme-te chu March 2020 hnu lam thlenga kalpui tura pawhsei an ni. 

    Aspirational Districts of NER 14-te hnenah fund, cheng vaibelchhe khat ṭheuh pek an ni. 

    NEDFi chuan hmarchhak state pariatah business meet ṭum 12 a buatsaih. NEDFi Venture Capital Ltd chuan sumdawnna kawnga bul-

ṭanna tur, start-ups kalpuina turin cheng vaibelchhe 32.28 a pe.