Assam-a venhimna kalpui dan tur leh NRC chungchang ngaihtuah

Assam-a venhimna kalpui dan tur chung­chang­ah leh National Register of Citizenship (NRC) kalpui chung­changah Thawhṭanni chawhnu khan New Delhi-a North Block-ah Home Ministry chuan high-level meeting an nei.Meeting-ah hian venhimna kalpui dan tur leh pawikhawihna thleng tur ven theih dan chungchang uluk taka ngaihtuah a ni tih an tarlang. Hemi bakah hian NRC kalpui mek chungchang pawh ngaihtuah a ni bawk. Meeting hi Union Home Minis­ter Rajnath Singh-a kaihhruaina hnuai­ah neih a ni a, Assam Chief Minister Sarbananda Sonowal, DGP Kuladhar Saikia, Assam Chief Secretary Alok Kumar, NRC Coordinator Prateek Hajela leh mi pawimawh dang eng emaw zat an tel a ni. Meeting an neih zawh hian CM Sarbananda Sonowal chuan NRC draft list-a India khua leh tui diktak tel lote tan manganna tur a awm lo tih a sawi. Exit poll aṭangin mipuite chuan Modi leh BJP an thlawpna a lang tih sawiin, Exit poll aṭang chuan Modi-an thuneihna a chang leh ngei dawn nia a lan thu a sawi bawk.Sonowal chuan Assam police-te chu Guwa­hati grenade puaka inhnamhnawihte darkar 24 chhung leka an man theih avangin a fak bawk. Assam-a venhimna kalpui dan tur chungchang uluk taka an ngaihtuah thu sawiin, NRC final list tihchhuah huna thil hrang hrang thleng thei chungchang pawh an ngaihtuah ho thu a sawi a, hmalak dan turte pawh an rel ho tih a sawi a ni.