AP CM-in 'Dekho Apna Pradesh' vai liam

Arunachal Pradesh chief minister Pema Khandu chuan an state-a tourism chawilarna tur, 'Dekho Apna Pradesh' campaign chu Thawhṭanni khan a vai liam. Itangar-a DK Convention Centre aṭangin PM hian a vailiam a, he hunah hian deputy chief minister Chowna Mein leh tourism minister Nakap Nalo te pawh an tel a ni. 'Dekho Apna Pradesh' hi prime minister Narendra Modi-a'n 'Dekho Apna Desh' campaign a siam zulzuia siam ve niin, Covid-19 hripui leng vanga Arunachal Pradesh tourism sector-in kawng hrang hranga a tuarna chhawmdawlna leh, tourism chawilarna tura duan a ni. CM Khandu chuan AP chu state lian tak a nih avangin, state mipuite ngei pawhin an state chhung a tourist hmun nuam tak tak chu an la tlawh lo nasa hle niin a sawi. State mipuite tan ngei pawh tlawh tur leh tribe dang culture zir tur tam tak a awm tih sawiin, an campaign buatsaih hi heng hmunte  tlawh kual tura mipuite fuihphurna a ni tih sawi. State mipuite ngeiin an state chhung hmun hrang hrangte an tlawh kual chuan inpumkhatna a siam bakah, tourism sector pawhin a hlawk phah ngei dawn a ni, a ti. Campaign thawh khatnaah hian touroperator, home stay owner, transporter, hotelier, blogger-te chuan a group-a inṭhenin state chhunga tourist circuit hrang hrangte an tlawh ang. Ni 10 chhung  an tlawh kual dawn a ni.Khandu chuan tourism chu investment tihna atana sector ṭha ber zinga mi ani tih sawiin, state chhunga sumdawng lian, entrepreneur leh ṭhalaite chu tourism bakah agriculture leh a kaihhnawih sector dangahte invest turin a sawm a, heng sector aṭanga hlawkna chu an hmun thei thuai dawn a ni, tiin a sawi. Tourism chawilarna atana a kaihhruai state sorkarin hma a lak dan hrang hrangte sawiin, Chief Minister’s Paryatan Shiksha Yojana (CMPSY), Chief Minister’s Paryatan Vikas Yojana (CMPVY) leh Chief Minister’s Advanced Certificate Course (CMACC) siam a nih thute a sawi bawk.