Tripura BJP MLA-in ganja legalise turin rawt

Tripura-a BJP MLA Diba Chandra Hrangkhawl chuan Assembly budget session neih mekah state chhunga ganja chin chu dan anga phalsak, legalise tura rawtna a thlen a, hei hi state economy tihchakna atan a ṭha dawn tih a sawi. Thawhṭannia Assembly session-ah MLA Hrangkhawl hian rawtna hi thlenin, ganja (cannabis) chuan damdawi atana ṭhatna pawh a nei tih sawiin, dan ang thlapa chin phalna pek a nih chuan an state sum lakluh a pun phah hle dawn tih a sawi. "A bikin thingtlang lam economy a ṭhat phah dawn a, ram chhung state ṭhenkhatah pawh sorkarin ganja chin hi a phalsak tawh tho bawk a ni," a ti. "Khap a ni chungin Tripura black market hmangin hralh chhuah reng a ni a, sorkarin phal lo mah se, dan beh theih a ni lo," tiin a sawi. Chief minister Biplab Kumar Deb chuan an state-ah ganja chin chu khap a nih thuin a chhang a, mahse MLA rawtna siam chungchangah hian legalise a nih theih dan turte ngaihtuah tura mithaimte a ngen tur thu a sawi. Hemi rual hian farmer-te chu dragonfruit, lakhuihthei leh vaimim-te ching uar tura tih an nih thu leh, hengte hi ganja chin ai chuan sorkar chuan a la thlan zawk thu a sawi bawk.