Arunachal Pradesh MLA thah thubuai:Sipai-ten beihpui an thlak nghal

Arunachal Pradesh MLA  nilai Tirong Aboh-a Thawhlehni-a thah a nih hnu khan sipaite chuan Khonsa leh a chhehvelah beihpui an thlak nghal.

Arunachal state khawpui Itanagar-a police official chuan sipaiten beihpui an thlak tih hi sawiin force dang pawh tirh luh belh an ni tih a sawi a, pawikhawihtute chu man ngei an tum tih leh a bultumtu ber pawh man ngei an tum tih a sawi a ni. Sorkar pawhin DIG (Eastern range), IGP (Law and Order), Tirap leh Changlang district Superintendent of Police (SP)-te chu pawikhawihna thlenna hmunah kal nghal tura an hriattir thu a sawi. 

Thawhlehni chawhma dar 11.30 velah khan Arunachal Pradesh-a NPP MLA Tirong Aboh-a chuanna convoy chu helten lo lambunin, MLA hi an that a, midang 10 an that tel bawk. Thi zingah hian Aboh-a fapa pawh a tel a, a personal security officers (PSO) pahnih an tel bawk. Thi zinga ṭhenkhat hi chu Aboh-a chhungkhatte an ni bawk nia tarlan a ni. Hmeichhe pakhat erawh a tlanchhiat hman avangin a a damchhuak tih an sawi.

Security mi pahnih chu silai-a kah hliam an ni bawk.Police-te chuan Aboh, a fapa kum tling lo leh midangte chu Assam-a Dibrugarh aṭangin Khonsa lam pana lirthei palia an tlan lai hi helte hian 12 Mile area-ah lo tidingin an kap ta tih an sawi. Helai hmun hi Khonsa aṭanga km 20 vela hlaa awm a ni.Arunachal Pradesh Chief Minister Pema Khandu, Arunachal MP leh Ministry of state for Home Affairs Kiren Rijiju leh NPP President Conrad Sangma-te chuan Thawh­lehni khan MLA thah a ni chu an dem tih an tarlang nghal.

Arunachal Governor Brig B.D. Mishra (Retd.) pawhin Aboh leh midang 10-in nunna an chan chu pawi a tih thu leh pawikhawihtute lakah pawh hremna lekkawh ngei a ni dawn tih a sawi ve bawk.Police-te chuan Aboh ni lo nunna chante hi  Wangngoi Hakhun, Jalin Hakhun, Gan­wang Hakhun, Matlam Aboh, Pangro, Aboh PSO-te pahnih- Ponhang Agi leh B. Siksa-te an nih thu an sawi a, he thu ziah lai hian midang pahnih hming erawh an la tarlang tel lo. NPP President Conrad Sangma chuan he thilah hian Prime Minister Office leh Union Home Miniter Rajnath Singh-te pawh inrawlh ngei tura a beisei thu a sawi tawh bawk. Tirong Aboh leh midang 10 thattu helte hi NSCN-IM-te an nih an ring a ni.