Naga SAZ-ah Myanmar sipai-ten beihpui an thlak chhunzawm

Myanmar-a Naga-te chenna (Naga Self Administered Zone)-a Myanmar sipai-ten beih­pui an thlak chu Thawh-ṭanni thleng khan an la kalpui chhunzawm zel nia tarlan a ni.

Chen Hoyat thingtlang bula ramngaw chu Thawh­ṭanni thleng khan an la bomb chhunzawm zel tih tarlan a ni a, Hoyat, Throilu leh Nyanching khuaa cheng civil mite chu khawiah mah an kalchhuak ngam lo nia sawi a ni bawk.

Eastern Konyak Union (Myanmar) pre­si­dent, SA Khotai leh general secretary, K Honwang-te chuan thuchhuah an siamah Myanmar sipaite hian Thawhṭanni chawhnu dar 1 aṭang khan bomb an tipuak leh tih an tarlang a, kar liam ta aṭang khan chhun zan zawma inkahna a thlen reng bawk avangin Hoyat, Throilu leh Nyanching khuaa chengte chu khawiah mah an kalsawn ngam lo tih an tarlang.

Myanmar sorkar chuan sipaiin an ram chhunga thuneihna an chan chu titawpin democracy kalpui tiam reng mah se Myanmar sipaite hian kumtinin Naga-te chenna hmunah hian beihpui an thlak ziah tih Union chuan an sawi.Eastern Konyak Union-te hian NSCN-K-te pawh bepawpin Myanmar sorkar nena kum 2012-a inremna an siam, inkahhai an puan chu kalpui hram turin an ngen a, NSCN-K lam pawh hian silai pakhat pawh Myanmar sipaite lakah hian an hmetpuak lo tih an sawi a ni.NSCN-K chuan May 16-a Myanmar sipaiten beihpui an thlak ṭan aṭang khan silai pakhat pawhin an la kap let lo tih an sawi.