BJP ka zawm chuan NIA-in bail-a chhuah min tiam : Akhil Gogoi
Raijor Dal party president, anti-CAA (Citizenship Amendment Act) activist Akhil Gogoi chuan tihnawmnah leh nghaisak a tawh thu leh,
National Investigation Agency (NIA) aiawha thu zawtfiahtute chuan RSS emaw, BJP emaw a zawm chuan bail-a chhuah tir an tiam thu a sawi. Gogoi hi kum 2019 December thla khan NIA chuan CAA dodalna a lantir avangin an man a, jail-ah khung a ni. Mahse Covid-19 a kai avangin Gauhati Medical College and Hospital-ah dah luh niin, a natna dang avangin enkawl chhunzawm mek a la ni.
Thawhlehni khan Gogoi hi a chunga thil thleng chungchang a sawina lehkhathawn tichhuakin, NIA-ten an man hnuah kum 2019, December 18 khan court phalna la loin Delhi-ah hruai a ni tih a sawi. "NIA headquarters-a lockup no 1-ah dah ka ni a, blanket bal tak pakhat chiah min pe a ni. Khawvawt tak, 3-4 degress celsius hnuaiah khan blanket pakhat chauh nen chhuatah ka mu ṭhin a ni," a ti. NIA official-ten thu an zawhfiahnaah, RSS a zawm chuan bail-a an chhuah tir nghal tur thu an hrilh tih a sawi bawk.
"Kan rawtna hi ka duh loh hnuah, BJP zawm turin min sawm leh a ni. BJP ka zawm chuan assembly-ah ka ding ang a, minister pawh ka nih tur thu min hrilh bawk," tiin Gogoi chuan a sawi. A pawl awmna, Krishak Mukti Sangram Samiti (KMSS) chhuahsana NGO thar dinna turin Rs vaibelchhe 20 pek an tiam a, Assam mipuite Kristian sakhuaa an inlet tur dang tura thawk tura sawm a ni tih a sawi bawk. "An rawtna hrang hrangte ka pawm duh loh hnuah, chief minister leh minister chak tak pakhat nena meeting nei turin min sawm leh a, mahse hei pawh hi ka hnawl leh tho a ni," tiin Gogoi chuan a sawi. NIA rawtna hrang hrangte a hnawlsak hnuah, khua leh tui ṭha lo leh thuawih lo tak tiin an sawi zui a, thubuai rip tak an siamsak zui ta tih a sawi bawk.