KSO-in Manipur-ah nawrh huaihawt dawn

Manipur-a Kuki Students’ Organisation (KSO) chuan state sorkarin Scheduled Tribe (ST) list aṭanga 'Any Kuki Tribe' tih paih an tum chu duh loin, March 26-27 hian state pumah nawrh huaihawt an tum. 

Kum 2018, October 19 khan state cabinet meeting chuan recognised ST list aṭangin 'Any Kuki Tribes' tih chu paih an lo remti tawh a ni. Kuki zirlai pawl chuan chief minister N Biren Singh hnenah memorandum pawh an thehlut tawh a, buaina nasa zawk a thlen lohna turin ST list aṭanga paih an tumna chu kalpui lo turin an lo ngen tawh bawk. 

KSO president Paotinthang Luphung chuan 'Any Kuki Tribes' tih chu paih lo tura an ngen hnuah state sorkar chuan an ngenna tihlawhtling tura hma a lak zui duh loh vangin March 26 leh 27-ah nawrh huaihawt hi an tum ta tih a sawi.