Assam Election 2021 : Inthlan thawh hnihnaa candidate tur zingah thubuai nei 11% awm

Assam assembly inthlan thawh hnihna, April 1-a neih turah candidate 345 an awm a, candidate zinga 37 (11%) chu criminal case nei lai an ni tih Association for Democratic Reforms (ADR) chuan a tarlang. Assam Election Watch leh ADR chuan candidate-te self-sworn affidavit thehluh zirchiangin, an zinga 37-te chuan criminal case an neih thu leh, heng zinga 30-te chu thubuai rip tak, serious criminial case nei lai an ni tih an sawi. Mi pathum chu tualthah kaihhnawih thubuai nei lai niin, mi pahnih chu tualthah tuma puhna thubuai nei an ni. 

ADR chuan candidate 345 zinga 73 chu mi hausa tawntaw, crorepati an ni tih sawiin, heng zingah hian BJP candidate 34, Congress candidate 28, AIUDF panga, AGP pahnih, Assam Jatiya Parishad candidate pathum bakah AIFB, SUCI (C) leh United Peoples Party Liberal member pakhat ṭheuh an tel. Candidate 209 ( 61%) chu zirna lamah Class 5-12 inkar an ni a, 131 (38%) chu graduate leh a chunglam an ni thung. Candidate pahnih chu diploma holder niin, ziak leh chhiar thiam tia inziak pathum an awm bawk. 

Inthlan thawh thumnaah candidate 323 awm
Inthlan thawh thumna, April 6-a constituency 40-a neih turah candidate 323 an awm. State chief electoral officer thupuangtu chuan inthlan thawh thumnaa chuh tuma nomination thehlut hi 362 an awm tih sawiin, heng zinga 17 chu enfiah an nih hnuah hnawl a ni a, candidate 22 chu an inhnukdawk leh bawk tih a sawi. 

April 6-a inthlan neih tura candidate zingah hian BJP minister Himanta Biswa Sarma (Jalukbari), Siddhartha Bhattacharya (Gauhati East), Chandra Mohan Patowary (Dharampaur), BJP state president Ranjeet Kumar Dass, AGP minister Phani Bhushan Choudhury (Bongaigaon), BPF minister -Pramila Rani Brahma (Kokrajhar East) leh Chandan Brahma (Sidli) te an tel. Inthlan thawh khatna hi Assembly bial 47-ah March 27 hian neih a ni dawn a, candidate 267 an awm a ni. Inthlan thawh hnihna hi April 1-ah bial 39-ah neih a ni ang.