Lok Sabha inthlan result puan a ni Hmarchhakah NEDA an che ṭha
Lok Sabha inthlan result chu rampumah nimin khan puan a ni a, Bharatiya Janata Party (BJP) an cheṭha hle a ni. Hmarchhakah pawh BJP leh a thawhpui NEDA-te chu an cheṭha hle a, Lok Sabha seat 25 awmah seat 13 velah chuan hnehna an chang ngei dawn nia hriat a ni. He thu ziah lai hian thuchiang hriat la ni lo mah se BJP leh NDA-a a thawhpuite chu an che ṭha hle.
Assam
Seat 14 awmna Assam Lok Sabha inthlanah hian 2014 khan BJP chuan seat 7 an la a, Congress leh All India United Democratic Front chuan seat thum ve ve lain, UPPL member pakhat in seat pakhat a la ve bawk.
Kuminah pawh hian Assam-ah hian BJP hi an cheṭha leh hle a, he thu ziah lai hian Seat 14 awmah seat 4 an la chiang tawh. All India United Democratic Front (AIUDF) pawhin seat khat an la chiang tawh bawk a ni. Congress chuan seat pahnihah hma an hruai mek a, Independent-a ding pakhatin seat 1-a la bawk. He thuziah lai hian thuchiang hriat hman a ni lo thung.
Barpeta Lok Sabha constituency-ah chuan he thu ziah lai hian Congress candidate Abdul Khaleque-a chuan hma a hruai mek a, BJP candidate Horen Sing Bey chuan Autonomous district council-ah hma a hruai mek a ni. AIUDF candidate Badruddin Ajmal chuan Dhubri-ah hnehna changin Gauhati-ah chuan BJP candidate Queen Oja chuan hma a hruai mek thung. Jorhat-ah pawh BJP candidate Topon Kumar Gogoi a chak a, Kaliabor-ah chuan Congress candidate Gaurav Gogoi-a chu hnehna chang turin a dinhmun a ṭha hle. Karimganj-ah BJP candidate Kripanath Mallah a chak a, Kokrajhar-ah chuan Independent candidate Naba Kumar Sarania-an hma a hruai mek bawk. Lakhimpur-ah chuan BJP candidate Pradan Baruah a chak a, Mangaldoi-ah pawh BJP candidate Dilip Saikia chuan hma a hruai mek a ni.
Nowgong-ah Congress candidate Pradyut Brodoloi chuan hma a hruai mek a, Silchar-ah pawh BJP candidate Rajdeep Roy chuan hma a hruai mek a ni. Tezpur-ah chuan BJP candidate tho Pallab Lochan Das chuan hma a hruai mek bawk.
Autonomous - Horen Sing Bey (BJP) Leading
Barpeta - Abdul Khaleque (INC) Leading
Dhubri - Badruddin Ajmal (AIUDF) Won
Dibrugarh - Rameswar Teli (BJP) Won
Gauhati - Queen Oja (BJP) Leading
Jorhat - Topon Kumar Gogoi (BJP) Won
Kaliabor - Gaurav Gogoi (INC) Leading
Karimganj - Kripanath Mallah (BJP) Won
Kokrajhar - Naba Kumar Sarania (IND)
Leading
Lakhimpur - Pradan Baruah (BJP) Won
Mangaldoi - Dilip Saikia (BJP) Leading
Nowgong - Pradyut Brodoloi (INC) Leading
Silchar - Rajdeep Roy (BJP) Leading
Tezpur - Pallab Lochan Das (BJP) Leading
Arunachal Pradesh
Arunachal Pradesh-ah hian Lok Sabha seat pahnih awmin Arunachal East leh Arunachal West-ah ṭhen a ni. He thu ziah lai hian seat pakhatah hian BJP chuan hnehna an chang tawh a ni.
Arunachal East-ah hian BJP candidate Shri Tapir Gao chuan hma a hruai a, Congress MP Ninong Ering-a bialah hian Congress chuan seat an hloh hmel hle. Arunachal West-ah chuan MP leh Union Minister of State for Home Affairs ni lai Kiren Rijiju chuan hnehna a chang a, heti hian Arunachal-a seat hnih awm chu chang ve ve thei dinhmunah BJP hi an ding.
Arunachal (East) - Tapir Gao (BJP) Leading
Arunachal (West) - Kiren Rijiju (BJP) Won
Manipur
Manipur-a Lok Sabha seat hniha seat pakhat zawk, Inner Manipur Constituency-ah chuan BJP-in hma an hruai mek a, Outer Manipur Constituency-ah erawh Naga People's Front-ten hnehna an chang thung.
Inner Manipur-ah hian BJP candidate Dr Rajkumar Ranjan Singh chuan hma a hruai a, Outer Manipur-ah erawh NPF candidate Lorho S Pfoze a chak thung. Manipur-ah hian BJP hian 2014 inthlanah khan seat an la lo a, kuminah erawh seat pakhat an lak hmel hle a ni.
Inner Manipur - Dr Rajkumar Ranjan Singh (BJP) Leading
Outer Manipur - Lorho S Pfoze (NPF) Won
Meghalaya
Seat hnih awmna Meghalaya-a Shillong seat-ah Congress in hnehna an chang a, Tura seat-ah chuan National People's Party-in hnehna an chang a ni. Tura constituency-ah hian Chief Minister unaunu NPP candidate Agatha K Sangma chuan hnehna a chang a, he bial hi a unaupa CM Conrad K Sangma bial hlui a ni. Shillong constituency-ah erawh bial MP nilai Congress candidate Vincent H Pala bawkin hnehna a chang leh.
Shillong - Vincent H Pala (INC) Won
Tura - Agatha K Sangma (NPP) Won
NAGALAND
Nagaland hian seat khat neiin Nationalist Democratic Progressive Party (NDPP)-in hnehna an chang a ni. Congress candidate K L Chishi chuan NDPP MP ni lai Tokheho Yepthomi chu a hneh zo lo a ni.
2014 LS inthlanah khan tuna CM nilai Neiphiu Rio hi thlan tlin a ni a, mahse 2018 assembly inthlanah khan a din dawn avangin a seat hi a chhuahsan a, by-election neihah Yepthomi hi a chak a, Nagaland MP hi a nih chhunzawm dawn ta a ni.
Nagaland - Tokheho Yepthomi (NDPP) Won
Sikkim
Seat khat awmna Sikkim-ah chuan he thu ziah lai hian Sikkim Krantikari Morcha-ten hma an hruai. SKM candidate Indra Hang Subba chuan seat awmchhun hi a lak hmel a, SDF nen inkhing tawk viau mah se dinhmun ṭha zawkah an ding a ni.
Sikkim - Indra Hang Subba (SKM) Leading
Tripura
Tripura hian seat hnih an nei a, Tripura East seat-ah leh Tripura West seat-ah ṭhenhrang a ni a, seat pahnihah hian BJP in hnehna an chang ve ve dawn niin a lang. He thu ziah lai hian BJP candidate Rebati Tripura chuan Tripura East-ah hma a hruai a, Communist Party of India - Marxist (CPI-M) Jitendra Chaudhury bial lai niin BJP hian CPI-M hi seat an chhuhsak hmel a ni.
Tripura West- ah chuan BJP candidate Pratima Bhoumik chu a chak thung a, Congress candidate Subal Bhowmik chuan boruak nei lian hle mah se a hneh zo ta lo a ni. Tripura hian a ṭumkhat nan seat pahnih hi an la dawn a nih hmel a, an tan chuan hmasawnna nasa tak a ni.
Tripura East - Rebati Tripura (BJP) Leading
Tripura West - Pratima Bhoumik (BJP) Won
(Henga result kan tarchhuahte hi final result a la nih loh avangin a la danglam leh thei a ni.)