AP-ah BJP in sorkarna siam dawn Sikkim-ah SKM-in kum 25 sorkar tawh an hneh
Lok Sabha inthlan neih ruala state assembly inthlan hmachhawn state pahnih, Arunachal Pradesh leh Sikkim-ah chuan sorkarna siam tur a chiang tawh.
Arunachal-ah hian Bharatiya Janata Party (BJP) chuan sorkarna an siam dawn tih a chiang tawh a, Sikkim-ah pawh sorkar mek Sikkim Democratic Front (SDF) chu kum 25 zet hnuah hnehin an awm a, Sikkim Krantikari Morcha (SKM) chuan sorkarna an siam dawn a ni.
A ṭum khat nan AP-ah sorkarna siam turin BJP tling!
Arunachal Pradesh-ah hian BJP-ten sorkarna an siam mek tih chu kan hre ṭheuh awm e, mahse mipuiten an thlantlin ngei BJP sorkar erawh a ṭumkhat nan Arunachal-ah hian a ding dawn chauh thung.
Kum 2014 assembly inthlanah khan AP-ah hian Congress chu sorkarna siam tura thlan tlin an ni a, mahse sorkarin buaina nasa tak an tawh avangin an party MLA tam tak chu an hel a ni. An hel avang hian tuna chief minister ni mek Pema Khandu ho hian MLA 33-te chuan People's Party of Arunachal an zawm a, sorkar thar an siam hnuah BJP-ah hian an inlet leh ta dual a, term hmasa chhung khan AP-ah hian sorkar pathum a ding hman.
Tunah erawh mipuite thlan tlinna ngeiin BJP hian sorkarna an siam thei tawh dawn thung. Seat 60 awmna AP assembly-ah hian he thu buatsaih lai thleng hi chuan seat 34 an la tawh a, seat pathumah hma an hruai mek bawk. Nimin piah lamah daih tawh khan vote chhiar ni mah se Election Commission lam chuan nimin thleng pawh khan pathum result hi an la tichiang lo a ni.
State BJP hruaitu zinga hnehna chang langsarte chu Pema Khandu (Mukto), Deputy Chief Miniser Chowna Mein (Chowkham), Minister- Wanki Lowang leh Honchun Ngandam-te an ni. Arunachal-ah hian seat 57-ah inthlanna an nei a, seat dang pathumahte hian chuhpuitu awm loin BJP an chak. ECI website-ah chuan seat 55-a an dinhmun hetiang hian an tarlang.
Party Chakna Hmahruaina Total
Bharatiya Janata Party 34 3 36
Independent 2 0 2
Indian National Congress 4 0 4
Janata Dal (United) 7 0 7
National People's Party 4 0 5
People's Party of Arunachal 1 0 1
Total 50 5 55
Kum 25 zet hnua eptu lama ṭangtur SDF
Dinhmun ṭha zawkah a din reng theih loh tih tichiang turin Sikkim-a sorkarna siam mek, Chief Minister Pawan Chamling kaihhruai Sikkim Democratic Front-te chu eptu lamah an ṭan ve a ngai dawn ta.SDF hian term nga zet Sikkim-ah hian ro an rel tawh a, tunah chuan Prem Singh Tamang-a (PS Golay tia hriat lar) kaihhruai Sikkim Krantikari Morcha (SKM)-te chuan sorkarna an siam ve thung ang. SDF hi an che chhe ta duai tihna erawh a ni lo a, seat 32 awmah seat 15 zet an la pha tho a, mahse SKM hian seat 17 an la thung a ni.
Footballer hlui Bhaichung Bhutia kaihhruai Hamro Sikkim Party (HSP) chuan seat pakhat pawh an la zo lo a, boruak nei lian viau ṭhin mah se beisei an phak meuh lo. Congress leh BJP pawh ding ve mah se seat an la lo ve ve a ni.
Party Chakna Hmahruaina Total
Sikkim Democratic Front 15 0 15
Sikkim Krantikari Morcha 17 0 17
Total 32 0 32