Tripura CM in lawmthu a sawi Buaina chhuak report a awm

Tripura Chief Minister Biplab Kumar Deb chuan Ningani khan BJP party office-ah press meet a ko a, Prime Minister Narendra Modi leh BJP National President Amit Shah-te chu a lawmpui thu a sawi a, Lok Sabha inthlana hnehna nasa tak an chan avangin mipuite hnenah lawmthu a sawi bawk.
Biplap Kumar Deb chuan thu inhnial theih tak tak hriat tur awm mah se Tripura mipuite chuan BJP-ah rinna an la nghat nasa hle tih a sawi a, hemi avang hian Tripura-a seat pahnihah pawh an chak thei a ni, a ti.

Kumar Deb chuan CPI-M-te chu bei zui bawkin, Tripura aṭang mai ni lo, ram pum aṭangin nuaibo an ni tawh tih a sawi.

Tripura hi Lok Sabha bial hnihah ṭhen a ni a, Tripura East-ah chuan BJP candidate Rebati Tripura chuan amah hnaih bertu Congress candidate Maharaj kumari Pragya DebBurman chu vote nuai hnih chuang zetin a hneh. Tripura West-ah pawh BJP candidate tho Pratima Bhoumik chuan amah hnaih bertu Congress candidate  Subal Bhowmik chu vote nuai hnih chuang thoin a hneh ve bawk. Heng seat pahnih hi CPI-M kut aṭangin an chhuhsak a ni.

Hetihlai hian state chhung hmun hrang hrangah buaina chhuak report a awm thung a, eptu party pahnih CPI-M leh Congress-te chuan kawng hrang hrangin beihna an tawk tih an sawi. CPI-M chuan tharum thawhna leh vauna an tawh avangin West Tripura-a an polling agent zawng zawngte chu an ko kir vek tih an sawi. Congress hruaitu car leh lirthei dang pakhat pawh Sepahijala district-a Bishalgarh-ah beih a ni bawk. Congress counting agent pakhat pawh Agar­tala-a Umakanta-ah beih a ni bawk a, hliam a tuar nia sawi a ni.

Tripura Police In­spector General Puneet Rastogi pawhin buaina chhuak report awmte hi thudik a ni tih a sawi tawh bawk.