Nagaland-ah hel nia hriatten AR lambun Sipai pahnih an thi

Nagaland-a Mon district-ah Inrinni khan hel nia hriatten Assam Rifles patrol lai an lambun a, mi pahnih an thih a, mi paliin hliam an tuar.

Hel nia hriatten Assam Rifles-te an lambunna hi Tobu leh Ukha inkarah a nih thu tarlan a ni a, chawhnu dar 1.20 vela thleng a nih thu tarlan a ni bawk. Assam Rifles-te chuan Tobu khaw hmar lam km 4 vela hlaah 44AR sipai, Tobu aṭanga Ukha pan mekte chu lambun an ni tih sawiin, IED tihpuah a nih thu an sawi a, sipai beih tawkte hi team dang henglai vela beihpui thlak mek ṭanpui tura kalte an nih thu an sawi bawk a ni.  

Bomb tihpuah a nih hnu hian an inkap zui tih sawiin, an inkahnaah hian AR sipai pahnih chu an thi tih an sawi. Thite hi Naik Subedar Dina Nath Ram leh Rifleman GD Kalidas Sharma-te an nih thu an tarlang. Hliam tuar mi palite hi Jorhat, Assam-a sipai damdawi-inah hruai nghal an ni a, an dinhmun erawh hlauhawm lutuk a ni lem lo tih an sawi.

He thu ziah lai hian eng pawl mahin inlambunna hi an tih a nih thu an la sawi lo a, Assam Rifles-te pawhin anmahni beituteah chuan hliam leh thi an awm leh awm loh pawh an hre bik lo a ni. Nagaland State Deputy Chief Minister, Y Patton chuan inbeihna thleng chu a dem thu sawiin Nagaland police-te chu thil awmdan chhui chiang nghal turin a ti. Nunna chan chhungte pawh a tawrhpui thu a sawi bawk.