Modi hmasawnna hnathawh vangin Assam-ah BJP kan chak: Sonowal

Assam Chief Minister leh Bharatiya Janata Party (BJP) hruaitu  Sarbananda Sonowal chuan Lok Sabha inthlana Assam-a hnehna an channa chhan chu Prime Minister Narendra Modi-an Assam-a hmasawnna hna a thawh ṭhat vang a nih thu a sawi.

Sarbananda Sonowal chuan India rama hnehna an chan chu Modiji tsunami tiin a sawi a, Modi chuan inpe tak chunga hnathawhna chuan engkim a tih theih tih a lantir tih a sawi. Prime Minister chuan mi rethei leh rualbanlote tan hna a thawh kawp theih tih a lantir a ni, a ti. State zawng zawng chu an len leh len loh lam en loin a ngaihsak vek tih a sawi bawk.

BJP president Amit Shah pawh fakin Sonowal chuan politics lama a thiamna hmangin inthlana kalphung tur mumal takin a rel fel tih a sawi. Ram puma party worker-te chu an party tana ṭha taka thawk turin a hneh thei tih a sawi a, mipuite chuan mi rinawm an thawhpui  a ni tih an pawm thu a sawi bawk a ni. Modi chu mi rinawm leh ram tana inpe tak a ni, a ti.

Assam CM chuan hmarchhaka BJP chet ṭhat chhan pawh Modi a nih thu a sawi a, hmarchhaka hmasawnna hna tam tak a thawh avangin mipuite chuan an ring tih a sawi a ni. Congress chu hmarchhak ngaihthahah a puh bawk. CM chuan Congress chuan kum 55 an sorkar chhungin hmarchhak chu an ngaihthah tih a sawi a, hruaitu, policy leh tum ber pawh nei loah a puh bawk. An chak lohnate chu an nei let tawh dawn lo tih a sawi a ni.

Assam-ah hian Lok Sabha seat 14 a awm a, BJP hian seat 9 an la a ni. Cong­ress chuan seat 3 an la ve bawk a, Inde­pendent candidate pakhatin seat 1 a la a, AIUDF-in seat 1 an la ve bawk.