CAA chungchanga BJP dinna a danglam zel : Assam Congress

Congress party chuan Assam assembly inthlan neih tura BJP-in manifesto a tihchhuahah Citizenship Amendment Act (CAA)  an sawilan loh chhan zawtin, BJP chu CAA chungchanga an dinna chu state hrang hranga a danglam niin an sawi. 

"BJP hian West Bengal-ah CAA an duh thu an sawi a, Tamil Nadu-ah erawh an duh loh thu an sawi thung. Assam-ah he dan chung­chang hi engmah an sawilang leh duh lo bawk. Mahse Congress chu CAA chungchangah khawi hmunah pawh a dinna ngaiah a ding zel dawn a, he dan hi kan duh lo a, sut a nih theihna atan theihtawp kan chhuah zel dawn a ni," tiin Congress party thuchhuah chuan a tarlang. 

BJP hian West Bengal-a manifesto an tih­chhuahah, sorkarna an chan chuan cabinet meeting hmasa berah CAA kalpui a nih theihna tura tihfel nghal an tiam a, Tamil Nadu-ah chuan he dan ṭhiat tura sorkar laipui an nawr tur thu sawitu, AIADMK chu an thawhpui thung a ni. Assam-ah an mani­festo tihchhuaha BJP hian CAA chungchang hi engmah an sawilang lo a, an telh loh chhan hi hriat an duh thu Congress party chuan an sawi.