AP CM-ah Pema Khandu lalut dawn

Pema Khandu chu vawiin hian Arunachal Pradesh chief minister thar atan lakluh a ni dawn a, CM term a zawna a chelhna tur a ni. 

Arunachal BJP legis­lature party chuan Pema Khandu hi CM tur hian Thawhṭanni khan an thlang leh a ni. Thawhṭanni vek khan Khandu leh legislator dang- Deputy Chief Minister hlui Chowna Mein leh state BJP chief leh MP thlan tlin thar Tapir Gao-te chuan state Governor Brig. B.D. Mishra chu Itanagar-a Raj Bhavan-ah hmuin sorkarna an siam theih thu an hrilh.

Khandu chuan governor hnenah hian member 60 awmna Arunachal Pradesh Legislative Assembly-ah an party BJP chuan  seat 41 an la tih hrilhin, heng zinga 40-te hian lungrual takin Arunachal seventh Legislative Assembly leader turin an thlang tih a hrilh bawk.
Constitution-a Article 164 (1) hnuaiah governor chuan Pema Khandu chu Arunachal Pradesh chief minister turin a ruat nghal a, sorkarna siam tura sawm nghal bawkin vawiin hian state khawpui Itanagar-a Dorjee Khandu State Convention Centre-ah chief minister tura thutiam la turin a sawm a ni. 

Governor chuan Khan­­du chu a Council of Minister turte ruat fela a hnena hriattir leh turin a ti bawk. Arunachal Pradesh cabinet hluite hian sorkar thar an siam theih thuaina turin Pathianni khan sorkar hmasa an ṭhiat tawh a, governor hnenah banna an thehlut vek tawh a ni.

Cabinet-in Tirong Aboh an hrereng
Pema Khandu kaih­hruai Arunachal State cabinet chuan Thawhṭannia meeting an neih zawh hnuah khan an state MLA thi ta Tirong Aboh leh a zuitu midang 10-te thihna sun nan ngawi rengin minute hnih an ding. Cabinet chuan Aboh-a hnathawhte chu an hrereng tih an sawi a, pawisawi lo mi 11 thihna chu na takin an dem tih an sawi bawk a ni.