Tripura-ah BJP thlawptu an that Congress leh CPI-M tihah an puh

West Tripura district-ah Pathianni khan BJP thlawptu pakhat thah a ni tih police-te chuan an sawi.

BJP-te chuan CPI-M-te chu mawhphurtuah an puh a, mahse commu­nist party hian an pha thung. State BJP thupuangtu Nabendu Bhattacharya chuan an party thlawptu chu Banikya Chowmuhani area-ah thah a ni tih an sawi a, CPI-M-te chu mawhphurtu an ni tih report an dawng tih leh Congress thlawptu ṭhenkhat pawh an inhnamhnawih tih an dawn thu a sawi a ni.

Police-te chuan mitthi hi Shibu Das a ni tih an sawi a, Banikya Chow­muhani area-ah hian hliam na tak tuara hmuh a ni tih leh police station an panpui laiin a thi tih an sawi. Thubuai ziahluh nghal a ni a, chhuizui a ni nghal dawn tih an sawi bawk. Zirtawpni liam ta khan BJP thlawptu tho Biju Bhowmik chu West Tripura district-a Fatikcherra-ah thah a ni tih Bhattacharya chuan a sawi bawk a, Lok Sabha inthlan result puan hnuah an party thlawptu pahnih an thi tawh tih leh BJP thlawptu 25-te chu sawi­sak an ni tih a sawi.

Eptu CPI-M-te chuan BJP in an puhna chu thu belhchian dawl lo a ni tih sawiin BJP thlawptu pahnih thihna chu an­mahni inkara inhuatna chhuak vang a nih thu an sawi bawk a ni.