Ruahsur vangin Assam-ah harsatna tawk

Tunhnaia hmarchhak hmun ṭhenkhata ruah nasa taka a sur avangin mi tam takin harsatna an tawk mek a, Assam-ah chuan mi 30,000 velin an tuar nia tarlan a ni.

Jorhat district-a khaw pariat leh Karimganj district Barak valley-a khaw 52 vel chu tuilian vangin an buai hle nia tarlan a ni bawk. Karimganj district thuneitute chuan Longai lui tui leh Singla lui lian chuan a chhehvel khuaa chengte a tibuai hle tih an sawi. 
Karimganj, Deputy Commissioner, M S Manivannan chuan tuilenna hmunte hi tlawhin chhawmdawl hna thawh dan turte a enpui tawh a ni.

Relief camp eng emaw zat buatsaih tawh a ni a, heng camp-ah hian mi eng emaw zat chu an awm tawh nia tarlan a ni bawk. Assam State Disaster Management Authority (ASDMA) chuan Karimganj district-a mi 23,550 vel chuan Thawh­lehni khan tuilian vang hian harsatna an tawk tih a sawi a, Jorhat district-ah chuan mi 3,563 velin harsatna an tawk bawk tih an sawi.

National Disaster Response Force (NDRF) leh State Disaster Response Force (SDRF)-te chuan chhawmdawl hna hi an thawk nghal bawk a ni.