Meghalaya CM-in lungalhthei chung-changah Shillong MP a chhang let

Meghalaya Chief Minister Conrad K Sangma chuan Shillong MP Vincent H Pala-a'n lungalhthei phurh chungchanga a thusawi chu Thawhlehni khan chhang letin, Cong­ress chu an hlawhchhamnaah MDA sorkar mawhphurhtir tumah a puh.

Conrad K Sangma chuan lungalh­thei lak khapna hlih a nih theihna tur chungchangah Congress chuan hma ṭha takin an la ngai lo tih a sawi a, hemi avang hian tun thlengin lungalhthei chungchanga buaina hi an la neih phah tih a sawi. Congress chuan kum 2014-a lungalhthei lak khap aṭang khan kum li chhung buaina chinfelna hun an nei tih a sawi bawk.

Sangma chuan midang an puh dawn a nih chuan an hunlaia an thil tih an enlet hmasa tur a ni ang, tiin a sawi. MDA sorkar erawh chuan hemi chung­changa buaina hi an ngai thutak hle tih sawiin, apex court-ah pawh case an file tawh tih Sangma chuan a sawi. Hei hian tuna sorkar mekin a thil tih tum chu a tilang chiang hle tih a sawi bawk. Congress chuan midang an puh dawn a nih chuan case pawh anmahniin siam ve mai rawh se, tiin Vincent H Pala thusawi a chhanglet a ni.

Chief minister chuan state chhhunga boruak a thianghlim zawk nan leh lungalhthei khura hnathawkte an him zawkna turin lungalhthei lakchhuah dan mumal zawk leh science thiamna hmanga hnathawh dan turte an ngaihtuah mek tih a sawi. Shillong MP hian Thawhṭanni khan Meghalaya aṭanga dan loa lungalhthei phurh chhuahnaah Minister, MLA leh police hotute chuan chan (share) an nei ve tih a sawi a, hei hi CM hian a chhanglet a ni. Deputy Chief Minister Prestone Tynsong pawhin Pala hi chhanglet ve bawkin Minister inrawlhte hming chu sawilang turin a ti tawh bawk a ni.