SC-in Meghalaya journalist laka FIR thehluh hnawlsak

The Shillong Times editor, Patricia Mukhim-i'n Meghalaya-a non-tribal te laka tharum thawhna thleng a demna thu Facebook-a a post avanga a laka FIR thehluh chu Supreme Court chuan Ningani khan a hnawlsak. 

Nikum July 3 khan mi ṭhenkhat hmaituam­te chuan Lawsohtun khuaah basketbalol court-­ah mi panga kut an thlak a, Mukhim hian a tukah he pawikhawih­na thleng chungchang hi ziakin, pawikhawihtute hriatchhuah an nih loh avangin Lawshotun village council-te a dem­na thu hi a Facebook-ah a ziak a ni. Meghalaya-ah chuan non-tribal ten beih an tawh fo thu leh, pawikhawihtute hi man an nih ngai loh thute a ziak bawk. 

A thuziah avang hian July 7 khan village council chuan Mukhim lakah complaint an thehlut a, hnam inkara inhuatna thlen thei zawnga thu ziakah puhin police-te chuan Indian Penal Code (IPC) section hrang hrang hnuaiah thubuai an siamsak zui a ni. Mukhim hian Meg­ha­laya High Court-ah a appeal a, nikum November 10 khan High court bench chuan ngaihtuahin, a laka FIR thehluh tihtawp sak tura a ngenna chu a hnawlsak a ni. Hemi hnu hian Supreme Court lamah a zualko leh a, Ningani khan ngaihtuahin Mukhim lama FIR thehluh chu a hnawlsak ta a ni. 

Mukhim chuan non-tribal thlawptu ni loin, human rights thlawptu a nih tih a sawi a, dik lo taka kut tuarte tan aw a chhuah zel tur thu a sawi.