AP MP-in indonaa China sipai 79 thattu chawimawina pek phut

Arunachal Pradesh BJP MP, Tapir Gao chuan sorkar laipui hnenah kum 1962 Indo-China War laia amah chauha China sipai 79 kaphlumtu, Havalder Sher Thapa chu thi tawh mah se huaisen chawimawina pe turin a phut. 

Lok Sabha-a thu a sawinaah MP Gao chuan, "Jammu & Kashmir Rifles 2nd Battalion-a Havaldar Thapa hian November 19, 1962 khan Arunachal Pradesh-a Subansiri sector-a indonaah amahin China sipai 79 a kaphlum a, mi dang 150 vel a kap hliam bawk a ni," tiin silai mu a neih tawh loh hnuah China sipaite chuan Thapa hi an kaphlum zui ve ta ni, a ti. He thil thleng chungchang hi kum 1962, November 19 khan Chinese radio-ah pawh puan a nih thu a sawi bawk. 

MP chuan defence minister Rajnath Singh, Indian Army Chief leh mi pawimawh dangte hnenah pawh Thapa hnena huaisen chawimawina pe tura a lo ngen tawh thu a sawi. Havalder Sher Thapa hi kum 1928, December 27-a piang niin, kum 1957, January 1 khan Indian Army-ah a lut a ni. Sipaite cho phurna atan te, mipuite himna tur rami vengtu sipaite chawimawi an phu zia lantirna atan, havalder Thapa hi a thih hnuah huaisena chawimawi pek a phu a ni, tiin MP chuan a sawi.