Nagaland police-ten marksheet lem siamtute man

Nagaland police-te chuan marksheet lem siam a, sumdawnna atana hmangtu mi pathum an man.  

Nagaland Board of School Education (NBSE) chairman chuan technical institute hrang hrang, Tamil Nadu leh Karnataka aṭanga enfiah tura NBSE hnena marksheet leh educational certificate dangte chu a lem eng emaw zat hmuhchhuah a nih thu police hnenah a hriattir a, hemi hnu hian SIT hian an chhui zui ta a ni. 

Deputy SP (Crime) kaihhruai CID branch-a special investigation team (SIT) chuan marksheet leh HSLC & HSSLC educational certificate lem siam a, hralh ṭhinte manchhuah tum hian hun eng emaw chen an chhui a, mi pathumte hi Assam state hmun hrang hrangah an man ta a ni. An mi mante kut aṭang hian marksheet lem, NBSE official seal lem, laptop leh electronic equipment eng emaw zat an man tel bawk. An thurualpui dangte pawh zawn chhunzawm mek an ni tih police-te chuan an sawi.