Assam election 2021 : Inthlan thawh khatnaah vote 77% chuang a tla

Assam assembly inthlan thawh khatna chu March 27, Inrinni khan assembly bial 47-ah neih a ni a, inthlana thawh khatnaah hian vote 77% chuang a tla. 

Inthlan thawh hnihna hi April 1 leh, a thawh thumna leh hnuhnung ber chu April 6 hian neih a ni ang. Inthlan hi boruak muanawm tak hnuaiah neih a nih thu nodal officer, Rahul Das chuan a sawi. 

Election Commission of India-in a tarlan danin, inthlan thawh khatnaah hian candidate 264 an awm a, an zingah hian chief minister ni lai Sarbananda Sonowal, party din thar pahnih - Assam Jatiya Prarishad president Lurinjyoti Gogoi leh Raijor Dal president Akhil Gogoi bakah Asom Gana Parishad (AGM) hotu Atul Bora te an tel a ni. Candidate zingah hian hmeichhia 23 an awm tel bawk. 

Inthlan thawh khatna, bial 47-a neihah hian rorellai BJP chuan seat 39-ah candidate siamin, a thawhpui AGP chuan seat 10-ah an chuh. Congress chuan seat 43-ah chuhin, independent candidate 41 an awm bawk. Thla ruk chauha  upa, political party thar Assam Jatiya Parishad chuan seat 41-ah an chuh bawk. Kum 2016 assembly inthlanah khan inthlan thawh khatna neihna bial 47-ah hian BJP chuan seat 35 lain, Congress chuan seat kua leh party dangten seat thum an la a ni. 

April 29 hma exit poll buatsaih khap
Election Commission of India chuan Assam-ah hian April 29, zan dar 7:30 thleng exit poll buatsaih leh result tihchhuah a khap. 

Hemi chungchangah hian ECI chuan thuchhuah siamin, "Representation of People Act, 1951-a Section 126A-a Sub-Section (1) hnuaiah March 27, zing dar 7 aṭanga April 19, zan dar 9:30 thleng Assam Legislative Assembly 2021 inthlan kaihhnawihah print emaw electronic media emaw leh thil dang hmang pawhin exit poll buatsaih leh, poll result tih chhuah khap tlat a ni," a ti 

EC chuan inthlan kaihhnawih thil dang, opinion poll leh survey dang neih result tih chhuah chu vote thlak zawh aṭanga darkar 48 chhung khap a ni tih a sawi bawk.