Hmarchhak state-ah Covid-19 kai la awm lo Sikkim-in ILP pekchhuah titawp

Sikkim sorkar chuan khawvel ram hrang hranga Covid-19 leng mek chu an state-a lut tur venna kawng khat atan, foreigner-te hnena Inner Line Permit( ILP) a pek chu a tihtawp rih. 

State home department chuan Ningani khan thuchhuah a siam a, "Coronavirus leng mek avangin, ILP hi ram dang mi hnenah pek a ni tawh rih lo ang. Bhutan aṭanga kal tumte pawh hei hian a huam tel dawn a ni," a ti. State Tourism and Civil Aviation Department pawhin East Sikkim district mountain pass, Nathula-a kal phalna pek ṭhin pawh tihtawp a ni rih dawn tih a sawi nghal bawk. 

Ram dang mi, Sikkim tlawh tumte tan ILP hi state sorkar hnen aṭanga an lak a ngai a, ramchhung hmun dang aṭanga kalte tan Nathula tlawh turin chuan state Tourism and Civil Aviation Department aṭangin phalna an lak a ngai bawk a ni. 

Chief secretary SC Gupta chuan ILP pekchhuah chu thupek awm leh hma chuan tihtawp a ni dawn tih sawiin, check-post hrang hrangah pawh police dah belh a, an state lut turte uluk taka enfiah vek an nih theihna tura medical team-te hmanraw ṭha tak nena dah vek a rawt bawk. 

Sikkim thuneitute chuan state chhung mi, tunhnaia China emaw, Covid-19 lenna ram dang emawa zinte pawh a chhui mek a, heng mite hi an dinhmun enfiah sak an ni. An state-a lut, mi nuai li chuang enfiah an ni tawh a, heng zingah hian Covid-19 kai an la awm lo tih state sorkar chuan a sawi. 

Arunchal Pradesh sorkar pawhin an state-a Covid-19 lut tur veng turin theihtawp a chhuah mek tih a sawi. 

State Health and Family Welfare Minister Alo Libang chuan hri leng mek vang hian an state mipuite tan lo chiai phahna tur a awm lo tih sawiin, Arunachal Pradesh leh hmarchhak state dangah pawh he hri kai hi hmuh an la awm lo, a ti.

Libang chuan an state chhunga deputy commissioner-te chu district medical officer-te  nena meeting nei fo tur leh, hri leng venna kawnga an inbuatsaih dante ennawn fo tura hriattir an nih thu a sawi. 

Covid-19 chungchanga mipuiten zawhna hrang hrang an neihte lo chhang a, thurawn pe turin  state Integrated Disease Surveillance Program (IDSP)-ah 24x7 control room siam a nih thu minister chuan a sawi bawk. Hei bakah hian district tina hospital leh general  hospital-ahte khum pahnih aia tlem lo awm theihna tur isolation ward siam vek niin, Naharlagun-a Tomo Riba Institute of Health and Medical Sciences (TRIHMS)-ah khum panga awmna chu dah hran a ni bawk a ni, a ti. 

Nagaland sorkar chuan China leh Covid-19 lenna rama zinte chu thuneitute hnena inhriattir turin a ngen. 

State health and family welfare minister S. Pangnyu Phom chuan Nagaland-ah Covid-19 kai hmuhchhuah nia thuthang awm chu thu dik lo a nih thu sawiin, an state-ah he hri kai hi an la awm lo tih a sawi. State sorkar chuan hri leng mek venna kawngah theihtawp a chhuah a, district tina sorkar hospital leh sipai hospital-ahte isolation ward siam vek a ni, a ti. 

Manipur sorkar chuan state sorkar office hrang hrang-a hnathawktu tana biometric attendance a lak ṭhin chu Covid-19 leng vangin a titawp rih. 

Hri leng mek hi kuta thil khawih aṭanga inkaichhawn theih a ni mai thei nia sawiin, chief minister B. Biren Singh chuan hei vang hian thla khat chhung atan biometric atten­dance kalpui mek chu tihtawp rih a nih thu a sawi. 

Chief Minister chuan January thla laihawl aṭang khan state sorkar chuan hri leng laka invenna tur hian theihtawpin hma a la tawh tih sawiin, Manipur-ah he hri vei hi an la awm lo, a ti. Border area-a entry point hrang hrangah uluk takin an state-a lut turte chu enfiah vek an ni a, khualzin lut turte pawh a hmaa an ram tlawh leh an mi tlawhte chanchin kimchang enfiah a nih hnuah luh phalsak an nih chauh a ni, a ti. Mi 1,21,629 enfiah an ni tawh tih sawiin, heng zinga mi 12-te sample chu lak a ni a, mi 10 chuan Covid-19 an vei lo tih hriatchian a ni tawh a, mi pahnih result chu nghah mek a nih thu a sawi bawk. 

State sorkar chuan a ṭul huna hman theih turin isolation ward pahnih pawh a peih fel tawh a ni, a ti.