Tripura : Hri leng vangin West Tripura-ah Section 144 puang

Covid-19 hri darh tur venna atan West Tripura district-ah chuan nimin leh vawiin atan pungkhawm khapna, Code of Criminal Procedure (CrPC) hnuaiah Section 144 puan a ni. 

District magistrate Dr Shailesh Kumar Yadav chuan Section 144 hi zing dar 8 aṭanga zanlai dar 12 thleng puan a nih thu a sawi a, hei hi Holi festival chhunga mipui pungkhawm tur venna atana tih an nih thu a sawi. Mipui punkhawm khap tlat a ni dawn tih sawiin, sorkar laipuiin hri darh tur venna atana kaihhruaina a siamte chu state chuan a zawm tur thu a sawi. 

Yadav chuan, "Kar hnih liam ta chhung khan hri kai thar hi mi 38 an awm a, Maharashtra aṭanga rawn lutte chu test zel niin, kar hnih liam ta aṭanga rawn lutte pawh test an ni bawk a ni," a ti. Technical Advisory Committee on COVID-19 chuan tun hnaia an state-a hri kai hmuh thar tam zawk chu hmun danga zin chhuahna neite an ni tih sawiin, hei vang hian state mipuite chu thil ṭul tawp a nih loh chuan zin chhuak lo turin a chah.

Committee chairman Dr Subrata Baidya chuan tun hnaiah ram puma hri kai thar an pung leh nasa hle tih sawiin, tun hnaiah an state-ah pawh hri kai thar hi 40 an awm leh tih a sawi. Mipuite chu an inthlahdah chho a, hri laka invenna tura kaihhruaina siam, face mask vuah, social distancing leh kut sil uar tur tihte chu an zawm ṭha tawk lo hle a, hetianga inthlahdah chuan hun hlauhawm tak tawh chhoh leh mai a hlauhthawnawm hle tih a sawi.