Congress leh AIUDF thawkdun lo: Gogoi

Assam Chief Minister hlui leh Congress hruaitu hlun Tarun Gogoi chuan Pathianni khan Congress leh All India United Democratic Front (AIUDF) chuan a rukin eng inremsiamna mah an nei lo tih a sawi.

Tarun Gogoi chuan state BJP minister Himanta Biswa Sarma chu AIUDF chief Badriddin Ajmal ‘chota bhai’ (unaupa naupang zawk) a nih thu sawiin Prime Minister Narendra Modi chu a ‘bada bhai’ (unaupa upa zawk) a ni, tiin a sawi bawk.

BJP national general secre­tary leh North-East in-charge Ram Madhav chuan tunhnai lawk khan Congress chu mahnia inthlan hmachhawn ngam loah puhin AIUDF nena thawk dunah a puh. 

AIUDF chief Badriddin Ajmal pawh hian tunhnai lawk khan an party chuan Assam Lok Sabha inthlanah BJP in hnehna an chan lohna turin leh vote a darh loh zawk nan candidate pathum chiah an siam dawn tih a sawi. 

Gogoi chuan BJP in an puhna hi chhangletin thu dik lo a nih thu sawiin, tun ṭum Lok Sabha inthlanah hian BJP aia seat an hmuh hnem zawk dawn thu Pathianni tukah khan a sawi a ni. Congress President Rahul Gandhi pawhin AIUDF nen thawhdunna an neih leh neih loh a zawh hial thu sawiin a ni chuan AIUDF hneh an nih ngei theih nana candidate chak zawk dah a duh thu-a a chhan thu a sawi bawk. 

CM hlui chuan AIUDF lakah candidate chak lo tak an dah loh thu sawiin, Dhubri leh Barpeta-ah te pawh candidate chak tak tak an dah tih a sawi. 

Ajmal tan chona a sang:
Congress hian Lok Sabha inthlan awm tur atan hian Dhubri-ah MLA hlui Abu Taher Bepari an dintir avangin AIUDF Chief Badruddin Ajmal tan hian awlsam taka hnehna chan a harsat rin a ni. 

Dhubri hi Muslim tamna constituency a nih avangin Ajmal hian awlsam taka hnehna a chan theih rin ni mah se Congress in candidate lian tak an rawn dah takah hian chona a sang dawn hle a ni. Term hnih lai he bialah hian hnehna chang tawh mah se mi ṭhenkhat chuan hmasawnna a thlen lo nia sawiin, a tlin loh ring pawh an tam tawh hle.

Dhubri Lok Sabha consti­tuency hi April 23 hian an inthlang dawn a ni.