CPI(M) in Tripura CM MCC palzutah puh Congress Candidate in beih tawk leh

Tripura-a eptu party lian tak Communist Party of India- Marxist (CPI-M) chuan Chief Minister Biplap Kumar Dep chu model code of conduct palzutah puhin Election Commission hnen­ah complaint an thehlut.

CPI-M hian Biplap Kumar Dep hi sorkar hna tawktarh hmanga vote zawngah an puh. CPI-M West Tripura secretary Pabitra Kar chuan Parliamentary inthlan hmaa sorkar hna tawktarha hmanga vote a zawn avang leh tharum thawh tura midang a fuih chu mak an tih thu a sawi.

BJP-te chuan Cong­ress leh CPI-M worker, Lok Sabha candidate-te pawh telin an bei tih a sawi a ni. Congress Vice-presi­dent, Tapas Dey pawhin ECI hnenah hian Inrinni khan compalint thehlutin inthlan ni tur puan a nih hnu khan state chhungah tharum thawhna a hluar sawt hle tih a sawi. An party hruaitute leh worker-te chu campaign-naa tel lo tura vau an nih reng thu a sawi bawk.

Tripura Congress LS candidate Subal Bhowmik chu kar liamta Ningani khan beih a nih hnuah Tulamura, Udaipur-ah Pathianni khan beih a ni leh. Bhowmik chuan BJP worker 50 velin an beih­rawn rih sawiin, a security leh Congress worker dangte nen beih hi an tawk tih a sawi a ni.

Tripura Pradesh Cong­ress Committee (TPCC) president Pradyot Manikya chuan Congress candidate beih tawhna chu a dem thu sawiin an candidate an bei a ni mai lo a, democracy an bei a ni, a ti.