Tripura: IPFT hmeichhe hruaitu pathumin Congress an zawm

Tripura-a Indigenous Peoples Front of Tripura (IPFT)-a hmei­chhe hruaitu pathum chuan Pathian­ni khan Congress an zawm.

Pradesh Congress Committee (PCC) president Pradyot Kishore Mankya Debburman chuan Raj Andar-a thu a sawinaah BJP dona kawnga thawhdun puiah sawm mah se IPFT hruaitute chuan a sawmna chu an hnawl tih a sawi. IPFT hmeichhe hruaitu langsar tak tak pathumin an pawl an zawm chhan chu statehood hmachhuana tribal mipuiten tawrhna nasa tak an neih chu an hne tawh vang tih a sawi a ni.

Pradyot Kishore Mankya Debburman chuan mipuite chuan ‘Tipraland’ din a nih ring reng mah se bum leh tihder an nih thu a sawi. An hruaitu ṭhenkhat, state cabinet-a ṭhu te ngei chuan an mite chu an bum a ni, a ti bawk. Tripura Tribal Areas Auto­nomous District Council (TTAADC) area-a tribal-te tana state hran din ngiat vangin 2009 khan IPFT hi din a ni.

Pradyot hian IPFT hruaitu lu NC Debbarma leh general secretary Mevar Kumar Ja­matia, Biplap Kumar Dep sorkar hnuaia revenue leh tribal welfare minister ni mekte chu an mite bumah a puh a ni. Pradyot chuan Congress party chuan Constitution 8th schedule-a Ko­kborok putluh chu tribal party zawng zawngte chu an tiam tih a sawi a, Tripura ADC direct funding pek leh Citizenship Amendment Bill (CAB)-te chu tih boah an tiam tih a sawi bawk.

Tripura-ah hian Lok Sabha seat pahnih awmin April 11 leh April 18-ah inthlanna hi an nei ang.