Assam sorkarin NRC tana a sum dil belh Registrar General of India-in a hnawlsak

Assam sorkarin National Register of Citizens (NRC) kalpui hna tikhawtlai mek chu zawhfel a nih theihna atan sum pek belh tura a ngenna chu Registrar General of India (RGI) chuan a hnawlsak. 

State sorkarin sum an indaih loh thu leh, sum pek belh tura a dilna hi RGI chuan chhangin, he hna thawk tura sorkarin hnathawktu a lak belhte chu  ban a, sorkar hnathawk pangngaite thawh chhunzawm tir turin a ti a ni. 

NRC update na atana infra­structure leh data centre siamte chu government property anga la vek turin RGI chuan Assam sorkar chu a hriattir a, NRC update hna tihkhawtlai mek chu March 31 hnu lamah zo fel turin a ti bawk. 

NRC final list hi kum 2019, August 31 khan tihchhuah a ni a, list-ah hian mi  31,121,004 telin, mi 1,906,657 hmaih an ni thung. 

March 4 khan Assam sorkar chuan NRC update hna chu zawhfel a nih theihna atan thla  khatah cheng vaibelchhe 3.22 zel pek belh turin a ngen a ni. He project zawhfelna atan hian a tirah cheng vaibelchhe 1,602.66 ruahman a lo ni tawh a ni. 

RGI chuan Assam sorkar dilna a hnawl chungchangah, thla khat atana sum pek belh tura a phut chu tam lutuk niin a sawi a, hei bakah hian hna thawh tihkhawtlai mek zawhfel a nih hun tur leh, a zawhfelna atana sum mamawh zat tur pawh a sawichiang lo a ni, a ti.