Ṭawngkam ṭha takin Myanmar mite lo hnar rawh u : Manipur sorkar

Myanmar ram tualchhung buaina thleng mek avanga tlanchhia, Manipur state-a luh tumte chu ramri an kan phalsak lo a, ṭawngkam ṭha taka lo hnar turin Manipur sorkar chuan district official-te hnenah a hriattir niin EastMojo chuan a tarlang. 

Special secretary home, H Gyan Prakash chuan March 26 khan border district - Chandel, Tengnoupal, Kamjong, Ukhrul, leh Churachandpur deputy commssioner-te hnenah lehkha thawnin, "Ram ṭhenawm, Myanmar-a tualchhung buaina thleng mekah an ram mi eng emaw zat chuan border state, Manipur pawh telin, India rama rawn luh tum an awm tih report a ni. Mahse heng mite hi ṭawngkam ṭha takin lo hnar zel rawh u," a ti. 

Border district hrang hranga DC-te hnenah lehkha thawnah hian district thuneitute chu raltlante awmna leh ei tur pekna tur eng camp mah siam lo tura tih an ni a, civil society organisation-te pawh camp siam phalsak an ni lo tih tarlan a ni. Hliam tuar an awm erawh chuan damdawia enkawlna ngaihtuah sak tur tih niin, ramri kaltlanga luh tumte chu ṭawngkam ṭha taka hnar zel tur a ni, a ti. Hei bakah hian heng district-ah hian aadhaar enrolment titawp nghal tura hrilh an ni a, hmanruate pawh hmun him takah dahṭha tura hriattir an ni.

Kar liam ta Zirtawpni khan Myanmar mi pathum, silai kah fuh vanga hliam tuarte chu Moreh khuaa health facility-ah an lut a, Imphal lamah enkawl tura refer zui an ni. Heng mi pathumte hi Myanmar sipaite kah hliam nia sawi a nih laiin, Tengnoupal Superintendent of Police TH Vikramjit Singh chuan an hliam tawrhna chhan hi a hriat loh thu a sawi thung. 

March thla tir lama EastMojo-in chief minister N Biren Singh an kawmnaah khan, CM chuan Myanmar mipuite dinhmun chu a ngaihtuahawm hle tih sawiin, an ṭhenawm state CM a nih angin sipaite chet dan rawng tak hlaua tlanchhia, civil mite chu an state-ah lo dawngsawng turin an inpeih tih a sawi a, awmna tur, ei tur leh venhimna te pek an ni ang, a ti. Mahse hemi hnu, March 10 khan Myanmar ram aṭanga mi eng emaw zat India rama an rawn tlanchhiat hnuah, sorkar laipui chuan Myanmar border state - Arunachal Pradesh, Mizoram, Nagaland leh Manipur te chu India rama Myanmar mi lut turte lo dang turin a hriattir a ni.