Arunachal Pradesh-ah Prime Minister Modi
Prime Minister Narendra Modi chuan Lok Sabha leh State Assembly inthlan a ruala neihna hmun tur Arunachal Pradesh tlawhin an party tan a campaign.
Narendra Modi hian East Arunachal Pradesh district-a General Ground-ah Nilaini khan public rally-ah thu a sawi a, a thusawi ngaithla tura pungkhawm hi an ṭhahnem hle. A thusawinaah hian Congress party chu na takin a bei.
Congress in Arunachal ngaihsak ngai lo
PM Modi chuan India in zalenna a neih hnua kum 70 dawn ro an rel chhungin Congress chuan hmarchhak chu a ngaihsak ngai lo tih sawiin hemi avang hian inkalpawhna leh hmasawnna kawngah hmarchhak chu a hnufum bik tih a sawi.
Modi chuan, "Tunah chuan he stadium hi mi sang chuang rawn punkhawmna a ni ta. Kawngpui kan pe che u a - national highway, railway nen, India ram hmundang nena kan thlunzawm che u chhan chu keimahah rinna in nghah vang a ni" tia sawiin, Congress chu anmahni chauh inngaihtuah leh hmasawnna ngaihthahah a puh a ni.
A kaihhruai sorkar chuan kum nga chhungin an thutiamte an tihlawhtling tih a sawi bawk.
Congress manifesto hi dawt a ni
Prime Minister chuan Congress Manifesto chu “dhakosla patra” (dawt hlang document) a nih thu sawiin, kum 60 chhungin hmarchhak mipuite duhdan tihhlawhtlinsak loah a puh.
An sorkar chuan Arunachal Pradesh leh hmarchhak chu East Asia gateway-a siam an tum tih a sawi leh bawk. "Chhungkaw pakhat chuan kum 55 chhung ro an rel a, chuti chung chuan Arunachal Pradesh leh hmarchhak state-te tana thil tih ngai an tihsak tih an puang thei lo." tiin Congress chungchang a sawi. Chu chona chu a ni chuan hmachhawn a inpeih tih sawiin kum nga chhungin tih ngai zawng zawng ka ti ang chu ka ti thei lo a, mahse he 'chowkidar' hian hmasawnna a awm ngei theihna turin chawl loin a thawk a ni, a ti.
Modi chuan entirna te pe in Congress chuan kum 2004-a an manifesto-ah ram chhunga in zawng zawngah 2009 chuan eng kan pe vek tawh ang tih sawh mah se he manifesto tho hi 2009-ah an hmang leh tih a sawi. Sorkarna an chan khan thingtlang khaw 18,000 chu eng pek an la ngai tih a sawi bawk. Mahse BJP sorkar chuan heng zawng zawng hi ni 1000 chhungin eng an pe hman vek tih a sawi.
Congress dawt thutiam atanga kaiharh tur Chowkidar
Narendra Modi chuan vacation emaw chawlh emaw a lak an hre ngai em tih kalkhawm mipuite chu zawtin an hmangaihna chuan chhun zan zawma hnathawk turin chakna a pe tih a sawi.
BJP chu community hrang hrang culture, tradition leh history humhim tur an nih thu sawiin, Congress chu thuneih chauh duhah a puh. "He chowkidar hi chuan mipuite duhdan tihhlawhtlin a inpeih a ni" tia sawiin, Congress in kum 60 chhung ro an rel chhung leh anni sorkar in thla 60 ro an rel chhung khan Prime Minister engzatin nge an sorkar laia an state tlawh a zawt bawk.
Modi chuan kum nga chhungin vawi 30 vel Arunachal Pradesh leh hmarchhak a tlawh tih a sawi. Modi chuan, "Chowkidar chu a harh reng a, ‘Jaagte Raho’ ( harh reng ru) tia au chungin mipuite an tiharh reng a ni. Chowkidar chu Congress dawt thutiam leh thutiam dik lo lak ata kaiharh reng turin a lo kal a ni", tiin a sawi a ni.
Arunachal Pradesh hian April 11 hian Lok Sabha seat hnih leh State Assembly seat 60-ah inthlanna an nei dawn a ni.