AP: Thamna pek tumah BJP puh

Arunachal Pradesh Congress chuan Nilaini khan BJP chu thamna hmanga vote hmuh tumah puhin Chief Minister Pema Khandu convoy aṭangin cheng vaibelchhe 1.8 man a nih thu an sawi.

Congress chuan poll panel-te chu Prime Mi­nister Narendara Modi, Chief Minister leh a deputy-te lakah thubuai ziaklut turin an ti.

Congress chief spokes­person Randeep Surje­wala chuan hemi thu hi sawichhuakin Pasighat-ah CM convoy aṭang hian zanlaiah pawisa hi man a nih thu a sawi a, PM Modi-an thu a sawi hma zan lawka thil thleng a nih thu a sawi bawk.

Khandu leh a deputy Chowna Mein-te chu rang taka man a phut bakah Arunachal West Lok Sabha constituency BJP candidate Tapir Gao candidate nihna pawh hlihsak a phut tih a sawi.

Surejwala chuan Elec­tion Commission official, tualchhung thuneitute leh police-te awm lai ngeiin heng pawisa te hi man a nih thu sawiin a finfiahna video pahnih pawh a tarlang.

Video-te chu a dik ngei em tih chu an nemghet lo tih sawiin social media-ah hmuh tur a awm tih a sawi thung. Congress Youth Worker-ten complaint an siam avangin convoy chu dap a nih thu sawiin he thu ziah lai thleng hi chuan BJP leh EC lam hian thuchhuah an la nei lo thung.

Congress thupuangtu chuan EC lamin engmah an la sawi lo leh action an la lo chu a chhan a hriat loh thu a sawi a ni.